Boɖi kagʊyarɩ gʊ jɩ anii kǝbayarɩ bacaacaa

Gaja 2013 kaŋɔrɔ aboŋoka ‘ʊshilé  akoo-n’ʊɖǝn kʊja na GʊGʊ kanɖiyar a tɩ caacaa ashee anii kǝbayarɩ baŋunii. Bʊkɔɩ a taba caacaa ɖe nɩ ma gǝŋ wàà, baa anii kagʊyarɩ gʊpaŋa kʊ gʊ ŋɔ̂n ɖaɖaa kaalei gaɖǝn, ŋgaɖee ga shêe arɛ̀ gʊfaŋa koo ga cêre arɛ̀ ma, ashee atʊ. Ama Boɖi kagʊyarɩ anɖǝnɖǝn a pɩ ka n’aŋfǝlɔɔpʊ, anɖǝnɖǝn gboo a mana ka jɩ caacaa ɖe.

GʊGʊ kanɖiyar a ce Kʊtɔnʊ ma, n’a lee tapolii abɔɖɔka na mpǝrǝ nɖee Gʊboɖiyarɩ gʊ pɩ na ma ma. Ɩtanɩɩ ba lee na tapolii ɖe ma, ɩ tɩ ce ɖaa ɩkotoku ɩshɩnyɩʊ (40.000 F CFA) ma.

Arɩsǝma afɔnɔ ‘aŋɔrɔ anʊntaja ‘ʊshilé tǝb-n’ɩkolom kʊja gɩshilikɔnɔ jɩ gɩ ce na gʊjɔɔ gʊɖe. Gɩ kpa Boɖi ma, bɛrɛ baɖe ba tɩ fǝl sǝmaa. N’atʊ baɖǝn gɩ laa alʊwala ace jiŋgiri atɩ sala Gaja. Gɩ ɖoo na sǝmaa ma, na gɩ ce gʊyarɩcɩncaŋa nɩ na gʊjɔɔ ŋgʊɖee gɩ ce na ma, ashee pɩ ma. Ŋkǝŋ na GʊGʊ kanɖiyar a cam ʊwǝlǝ naa asala bɛrɛ baŋunii mbaɖee ba ɖa ŋkǝŋ ma, naa akɔɔ na gʊjɔɔ gʊɖe akara ʊŋono AYA GAƉO Amaɖu, ŋyɩɖa nɖee ba yɔ na nɩ ma na gǝŋ Agrii, agʊnyɛ nɩ. A lee ka Boɖi kagʊyarɩ ‘abɔŋɔnja. N’ʊni a tɔɔ atɩ kara gʊyà agʊnyɛ nɩ.

Ŋkǝŋ na gʊyà a cam ʊwǝlǝ asala GʊGʊ kaŋkulo ŋŋunii na GʊGʊ kanɖiyar Martɛɛŋ. Ansala kaŋkǝm na a taba atʊ bʊlei bʊnyɩʊ bʊɖǝn, na gɩ kʊɖa bʊ gboo ashee nɩ. N’a faŋa atʊ gaɖuu gɩ kâl tapolii ɖe ma. Na gɩ kal nɩ gʊyarɩcɩncaŋa nɩ ashee pɩ. Ɩ lee ʊciŋkǝrka ʊbʊmbɔnɔ ashee Boɖi kaayarɩfala ɖaa ba jɩ caacaa ɖe ma.

GʊGʊ kaŋkulo n tɩ kal tapolii Boɖi kagʊyarɩcɩncaŋa nɩ
GʊGʊ kaŋkulo n tɩ kal tapolii Boɖi kagʊyarɩcɩncaŋa nɩ
Malookiya IBRAHIM INUUSA

Laisser un commentaire