Ʊŋʊrʊ kasukuru kʊboŋu Penesul

Arɩsǝma afɔnɔ ‘aŋɔrɔ cɩɩnɩ kaja ‘ʊshilé tǝb-n’ɩnyɩʊ kʊja ʊ lee ka ʊshilé nɖee gɩ ce ʊŋʊrʊ kasukuru kʊboŋu kajɩŋgaarɩ Penesul kampá nɩ ma. Ʊshilé ɖe gɩ kpa ŋkǝŋ ma, ba cam atʊ gɩsaná naa ayɛɛ gaɖusǝka ashee atʊ.

Naɩ naa gɩ ye kpa, baɖe ba sǝ atǝn boŋo asǝba gʊcǝrá na bapi. Ba lee gʊcǝrá gʊɖe cei aboŋo ma, na ba shee atʊ ʊnyɩŋca gɩ ɖoo basukurupi baŋyɩɩ akʊɖa ntǝma nɖee SIL a na lee na shee atɩgɩkrǝ anii kaŋyɩɩ kʊceu ma. Gɩ tʊr atabʊsaʊ ashee pɩ, naa ataba bapi bʊlei bʊjala bʊɖǝn. Naa alǝ pɩ wàà, ba sɔ̂lɔ atɩgɩkrǝ naa alee koŋkaarɩ apala basana ba rǝ̂ŋǝ atɩgɩkrǝ gboo, naa gɩkrǝ gɩ sǝ̂ra ace ŋyɩɩ. Gɩ ta wʊ̂ɖa koŋkaarɩ ashee atɩgɩkrǝ, ɩ tɩɩ pâla ba faŋa jɩ ɩsukuru mana nɩ.

Bʊkɔɩ bʊ san n’atʊ awu ma na wàà, bafaŋaka ba lee koŋkaarɩ afaŋa basukurupi ɖaa atɩgɩkrǝ gɩ sǝba ma, n’arɛ̀ nɖee a shee atɩgɩkrǝ ŋyɩɖa wàà, anii ma, aŋyɩɖa. Bapi bɩcaacaa nɩ, ba taba pɩ bʊlei bʊɖe na ba shee kɩmaana. Bajɩŋgaarɩ ɖe a wala Penesul kaatǝnsapɩ kɩkoloji banʊn pɩ. Koɖowar, Penesul, Pɛnɛlaŋ, Naagayili na Boɖi. Ɩkoloji banʊn baɖe kǝbapi baŋunii na kǝbafaŋaka pɩ, gɩ wa na ma.

Caacaa ɖe ba lee ma, Boɖi na Naagayili kɩkoloji ba wa ka ʊboŋu nɩ ; na Boɖi kakoloji a tɩ jɩ. Ɩ lee ʊciŋkǝrka ashee basukurupi na kǝbafaŋaka na GʊGʊ kaŋkulo. Gaja ga shêe atǝbaŋunii sáà .

GʊGʊ kaŋkulo na sukuru kǝbapi ba ɖa ʊtʊr nɩ
GʊGʊ kaŋkulo na sukuru kǝbapi ba ɖa ʊtʊr nɩ
Malookiya IBRAHIM INUUSA

 

Laisser un commentaire