Anii kǝbaja Sʊwɛɖ kaatǝna nɩ

Gaja kotoku-banyɩʊ-na-tǝb-n’ɩnʊn yofo ‘aŋɔrɔ anʊntaja, aŋkul TSASKƐ Martɛɛŋ n’amʊ gɩ wa n’anii kǝbaja baɖǝn Sʊwɛɖ kaatǝna nɩ. Gɩ jeɖe ALAASAN Muhiɖin n’akar ALAASAN Rafatu n’ʊŋono FAFANA Sahaɖu Muhiɖin aŋku nɩ. Akar a lee shɩŋkaafa acǝkǝla na kaŋkǝma kpaarɩ abɔɔ, na Muhiɖin a lee [pankaka], Sʊwɛɖ kǝbaja bʊjɩʊ ɖǝn na gǝŋ. Ba cam atʊ gɩshɛbʊ, na gɩ jɩ ʊjɩʊ ʊsoŋsono n’ʊciŋkǝrka.

Gɩ faŋa pɩ abʊpa nɖee anii kaŋkulo n lee ma. Gɩ kiɖe anii kɩɩbii na gɩ tine GʊGʊ kabʊsaʊ ɛntɛrnɛtɩ laŋ. Gɩ tʊr abʊsaʊ ɩɖǝn na gɩ tine ʊtʊrcamka GʊGʊ kaŋkulo n kpeɖe naa aɖʊ ɛntɛrnɛtɩ laŋ ma. Ɩ san na pɩ ɖaa ʊtʊrcamka ɖe ʊ na kaŋa pɩ ba na tʊr atɩgɩkrǝ gɩshɛbʊ ma.

Ɩ san na pɩ ɖaa anii kagɩkrǝ gɩ ce ŋyɩɩ, na ɖaa ba sǝra atʊr anii kabʊpa Sʊwɛɖ kaatǝna nɩ ma.

Anii kabʊpa na GʊGʊ ɩ san na ALAASAN Muhiɖin n'ʊŋono FAFANA Sahaɖu
Anii kabʊpa na GʊGʊ ɩ san na ALAASAN Muhiɖin n’ʊŋono FAFANA Sahaɖu

Gɩ lee faawɩɩ gɩshɛbʊ, na gɩ faŋafaŋa ɖaa ba sǝ̂ra alee afaŋa babapi anii kagɩkrǝ bɩsukuru nɩ ma. Sʊwɛɖ kaatǝna ga wʊɖa mʊra nɖee a na lǝ wàà, basana babapi ba tǝ ba sǝ̂ra acere bagɩkrǝ sukuru nɩ, bapi banʊn ba ta mân aɖa gaɖu gaɖɔŋkɔnɔ.

Gɩ lǝ pɩ wàà, ba ta kpâ Bashɩɖɩ ashee gakoloŋ kʊwalʊ ʊbʊmbɔnɔ, gɩ tɩ gɩ cêre pɩ ɖaa ba nǝ ba sǝ̂ra afaŋa babapi anii kʊŋɔn na kʊtʊr ma.

Ɩ lee ʊciŋkǝrka ʊbʊmbɔnɔ ashee anii kaŋkulo Bashɩɖɩ nɩ, ɖaa anii kǝbaja Sʊwɛɖ nɩ ba sǝba ʊtʊr n’atɩgɩkrǝ ma. Gɩ tɩ sala anyɩn, naa naa nyiŋǝ anyɩn wàà, ɩ fâŋa anyɩmbasoro baŋunii ŋkǝŋ ɛntɛrnɛtɩ kabʊsaʊ ashee atɩgɩkrǝ !

Ɩ lee ʊshilé ʊfɔlɩ !

Stɛfani TSASKƐ

Laisser un commentaire