Atɩgɩkrǝ kʊwalʊ Gajaamatǝna nɩ

Anii kǝbaja baɖǝn ba ɖa Gajaamatǝna nɩ. Bannɩnɩ baɖǝn ba wʊɖa ɩgbɛ ɖǝn ba na yɩɖa wàà, “Nordbeninischer Verein Bassila e.V.”. Ba lee bʊwalʊ gaja kotoku-banyɩʊ-na-tǝb-n’ɩnʊn yofo ‘aŋɔrɔ anantaja ‘ʊshilé ʊnantaja Fraŋkfɔɔr [na gɩfɔnɔ : Francfort, na gɩjaamakrǝ : Frankfurt] kampá nɩ.

Bʊŋono GATAWURI Mohamɛɖ ba na yɩɖa wàà Bɛlmii ma, a yɩɖa amʊ n’aŋkul TSASKƐ Martɛɛŋ gɩ cê naa afaŋa pɩ abʊpa nɖee ɩ ɖoo anii kagɩkrǝ nɩ boŋo ma. Na gɩ ta Stʊtgaar [Stuttgart] kampá nɩ ace Fraŋkfɔɔr kampá nɩ na jirigi.

Gɩ kpa ŋkǝŋ ma, Bɛlmii aɖe pɩ atɩ sǝ na saa atʊ jirigi katɩɩsan abʊmbɔnɔ nɩ boŋo naa ataa atʊ n’alɔɔrɩ ashɛʊ n’afal. Gɩ kpa agafala nɩ ma, basǝmprǝ baɖe ba lee ʊjɩʊ ʊsoŋsono boŋo. Ba cam atʊ gɩshɛbʊ ɖaa ɩ sim ma, na gɩ jɩ jɩŋgaarɩ kʊjɩʊ.

Bɛrɛ ba ɖoo Ɖɔrtmʊnɖ [Dortmund] kampá, Kolɔnjǝ [na gɩfɔnɔ : Cologne, na gɩjaamakrǝ : Köln] kampá, Ɖʊsɛlɖɔɔrf [Düsseldorf] kampá, Regɛnsbʊrg [Regensburg] kampá, Walɖɔɔrf-Mǝrfɛlɖɛn [Walldorf-Mördfelden] kampá na Fraŋkfɔɔr kampá gboo.

Bɛrɛ baŋunii ba kpa ma, gɩ ɖoo n’anii kabʊpa ɩŋunii na gɩ man atʊr atǝganɔ. Gɩ tine GʊGʊ kabʊsaʊ ɛntɛrnɛtɩ laŋ, naa akiɖe abʊsaʊ ɩɖǝn. Ʊtʊrcamka nɖee GʊGʊ kaŋkulo n lee aɖʊ ma, ʊ kaŋa n’atʊ gɩ tʊr gɩshɛbʊ. Gɩ tine atɩgɩkrǝ kabʊsaʊ ɩfɔlɩ gɩ na yɩɖa wàà, na.gasana.org ma, naa atʊr abʊpa ɩɖǝn.

Basoro ba tɩ tʊr abʊpa
Basoro ba tɩ tʊr abʊpa

Anii kabʊpa na GʊGʊ ɩ san na bɛrɛ, basoro na basǝmprǝ baŋunii. Ba shɩ abʊpa ɩjala ɩɖǝn, na gɩ lee atɩgɩkrǝ kafaawɩɩ gɩshɛbʊ naa aye shɛʊ.

Basǝmprǝ ba tɩ shɩ abʊpa ɩɖǝn
Basǝmprǝ ba tɩ shɩ abʊpa ɩɖǝn

Ɩ san na GʊGʊ kaŋkulo ŋŋunii ɖaa anii kǝbaja Gajaamatǝna nɩ ba sɔlɔ atabʊpa na GʊGʊ ma.

Gɩ tɩ sala bɛrɛ baŋunii ba ɖoo ʊwalʊ ɖe nɩ ma. Ɩ lee ʊshilé ʊfɔlɩ !

Stɛfani TSASKƐ

Laisser un commentaire