Japaŋ na Bashɩɖɩ kaMɛɛrii bagʊsoro kǝbɛrɛ beriu baɖǝn bʊjeɖu SIL kaatǝnleeɖu

Alaamɩshɩ afɔnɔ ‘aŋɔrɔ tǝb-n’ʊɖǝn kaja ‘ʊshilé tǝb-n’ɩriu kʊja na Japaŋ na Bashɩɖɩ kǝbɛrɛ beriu baɖǝn ba jeɖe SIL agatǝnleeɖu. Bʊkpaʊ nɩ, gɩ cam pɩ gɩsaná gɩshɛbʊ, na ba sǝ atǝn. Bagʊsǝtǝna kaŋkǝm, na gɩ faŋa pɩ atalɔ na bʊkɔ mbʊɖee baa aŋa na a na lee GʊGʊ kaŋkulo nɩ ma.

Naa asaŋ kɔɔ faŋa pɩ abʊpa nɖee GʊGʊ kaŋkulo n lee n’atɩgɩkrǝ anii ma ; anyɔn na gʊcǝrá ba na yɩɖa wàà, SKRAABƎL [SCRABLE] ma. Gani kaŋkǝm na gɩ toŋo pɩ afaŋa atatǝma kaku afǝlǝfǝlǝ. Naa afaŋa pɩ acǝŋǝ ɖaa ba na kiɖe atǝgatǝnleeɖu kɩlaabaarʊ [blog] Ɛntɛrnɛtɩ laŋ ma. Gɩ shee pɩ bʊbʊkǝli mbʊɖee bʊ pâla ba ta kpâ babʊɖu ba sǝ̂ra na ŋǝ atabaamʊnʊ Ɛntɛrnɛtɩ laŋ ma.

Naa ba ye shɛʊ, gɩ man alaa ŋkulo kafoto. Ɩ san na pɩ ɖaa bʊkɔ́ɩ ba pɩ atɩ ŋǝ SIL agatǝnleeɖu ma. Bʊshɛʊ nɩ kǝ ba lee nshɩŋyɔ na bʊkɔ mbʊɖee ba pɩ atɩ ŋǝ GʊGʊ agatǝnleeɖu ma na.

Japaŋ na Bashɩɖɩ kaMɛɛrii bagʊsoro na GʊGʊ kaŋkulo
Japaŋ na Bashɩɖɩ kaMɛɛrii bagʊsoro na GʊGʊ kaŋkulo
Malookiya IBRAHIM INUUSA

Laisser un commentaire