Atǝbatʊrka, gɩ tɩ sala anyɩn. Ɩ lee ʊciŋkǝrka ashee atʊ, gɩ lǝ̂ anyɩn wàà, ɖoo bʊja tǝb-na-bʊnʊn gɩ wʊɖa anii kɩkɔɩ kʊkpatɩ ma. Ʊkpatɩ ɖe na gɩ na ŋɔn n’atɩgɩkrǝ anii. Ʊŋɔn ʊɖe tɩ lee na ŋyofotala na gǝŋ.
Ama ɖoo gaja kotoku-banyɩʊ-na-tǝb-n’ɩnan, gɩ wʊɖa anii kagɩkrǝ kʊŋɔn ɖeiɖei kambʊpá ma. Gǝŋ ma, nnyǝmǝ gɩ tɩ ŋɔn ɩwǝlǝ.
Ɩwǝlǝ ɖe ɩ pa asʊ̀rá ɩriu. Ɩwǝlǝ ɖe nɩ gǝŋ : ʊwǝlǝtaaka, ʊwǝlǝburoka n’ʊwǝlǝtʊka. Ŋǝ̂ ma ɖaa gɩ na ŋɔn ɩwǝlǝ ɖe ma :
wáá na gɩ na ŋɔn ʊwǝlǝtaaka ́
wáá na gɩ na ŋɔn ʊwǝlǝburoka ̀
wáá na gɩ na ŋɔn ʊwǝlǝtʊka ̂
Ɩwǝlǝ ɖe kantala ŋkǝka aŋɔn, gɩ na lo ɩsǝwa tuutuuma nɩ. Ɩɖe lee ɖaa ɩ yor cei ma.
Ama naa ʊŋɔn ɖe nɩ, ɩ ɖa sooci, atʊga Martɛɛŋ a pɛmpɛŋɛ anii kɩkɔɩ kʊkpatɩ ɖe alee. Atʊ gɩ tɩ sǝ̂ra na ŋɔn ɩwǝlǝ ɖe na gɩsǝwa gɩɖɔŋkɔnɔ. A kɔɔ pele atǝgatǝna Benɛɛ kɩkrǝ ɩŋunii kɩɩbii ɩkɔɩ kʊkpatɩ ɖe nɩ, apala ɖoo atʊtǝnlajala Bashɩɖɩ kɩkrǝ kɩɩbii kanɖǝnɖǝn ba cee ka ɖa ʊkpatɩ ɖe nɩ.
Ayofotala nɖee ɩ na lo wɩnɖoos [Windows] na linis [Linux] ma, ɩ tɩɩ sǝ̂ra alo anii kɩkɔɩ kʊkpatɩ ʊfɔlɩ ɖe.
Gɩ tɩ lige anyɩn wàà, gɩ tɩ lo anii kɩɩbii kʊkpatɩ ʊfɔlɩ ɖe boŋo atǝgatǝnleeɖu. Ʊkpatɩ ɖe, ʊ ɖa gboo ashee bɛrɛ mbaɖee ba na yɛɛ ba naa ŋɔ̂n atɩgɩkrǝ anii ayofotala nɩ ma.
Ɩ ta naa yɛ̂ɛ ʊkpatɩ ɖe, ɩ tɩɩ sǝ̂ra akim asǝla n’atʊ atɩgɩkrǝ anii kaafala gabʊmbɔnɔ nɩ koo ɩ ŋɔ̂n ashee atʊ nɔmba+229 66661111 laŋ.
Aŋɔnka : ƖSA ASIS Rahaman