Aɖɩtɛnɛɛ afɔ́nɔ̀ ‘aŋɔrɔ kulumi kaja ‘ʊshilé akoo-na-tǝb kʊja, gaja kotoku-banyɩʊ-na-tǝb-na-ganaana na SIL kaŋkulo Bashɩɖɩ n cam àsaná bagatǝnleeɖu. A jɩ ka wàà, Saalisu naa aɖa Nijɛr. Aɖe lee ŋkulo nɖee ba shee ŋyɩɖa WasAp nɩ wàà, anii kaŋkulo [GROUPE anii] ma, kanɖiyar ‘akǝŋja kpaarɩ na gǝŋ.
Afaawɩɩ nɩ, wàà, ɩ lee ʊciŋkǝrka na ashee aɖe, aɖe a yɔ anii kaatǝnleeɖu ma. Aɖʊwaa ntǝma nsoŋsono n na ɖoo na wʊɖa baɖe bʊtǝna bʊfɔlɩ nɩ. A boŋo ma, a nyiŋǝ ashee ŋkulo ŋŋunii.
Ɩ lee ʊciŋkǝrka ashee atʊ ɖaa gɩ na ŋǝ bajeɖeka ba na lee koŋkaarɩ na jeɖe gatǝnleeɖu na ŋǝ ɖaa ntǝma n na sara ma. Anii kaŋkulo nɖe nɩ gboo, gɩ tɩ faŋa atǝbawor mbaɖee ba ɖa bʊɖulǝŋka ma, atɩgɩkrǝ anii na ce. Gaja ga lâma ŋkulo nɖe kaŋŋuro.
Aŋɔnka : BABABƆƉƖ SAALIFU Nuhum