Yofo ‘aŋɔrɔ tǝb-n’ʊɖǝn kaja ‘ʊshilé tǝb-n’ɩnyɩʊ kʊja gaja 2019, GʊGʊ kaŋkulo n ce Naagayili atɩ faŋa anii koloji nɩ.
Gɩ kpa Naagayili ma, maa ba tǝ ba cǝ̂ apǝrǝ ashee atʊ gajaka naa gɩ ye tɩ́ cê sukuru nɩ gɩteŋshile atɩ faŋa anii. Ama gɩ kpa ma, k’a gɩ ŋǝ apǝrǝ acam na. Gɩ ɖa ŋkǝŋ wáá wuu halɩ sǝmaa katam a cim.
Kaŋkǝm na gɩ ye tɩ́ fǝl koloji nɩ. Gɩ kpa ŋkǝŋ gboo ma, sukuru kǝbapi kǝ ba cee kpa na. Ama ba tɩ́ kpa ma, bʊyɔgʊ ʊ tɩ́ na ɖoo ɖaa bɛrɛ gɩwa-gɩɖǝn bɛrɛ akoo ba mana ma. Akulo ɩnyɩʊ nɩ gɩ yʊga naa asǝ aku ɩnyɩʊ nɩ. Bɛrɛɩ ba pɩ ma, kǝ ba lee anii kǝbapi banɖǝnɖǝn na, Balʊgbaja, Basombaja, Batombija, Bafǝlanɖɩja…
Baŋunii ba ɖa ncǝn. Ama gɩ na faŋa pɩ ma, arɛ̀ k’a na yɔ wàà, bɛrɛ ba cǝkǝla bawor nɩ ɖaa gǝŋ ma na. Bacerecereka ba laa afaŋa atʊ ɖaa ba sɔlɔ anii kagɩkrǝ ma. Aɖʊwaa gɩ na faŋa pɩ ma, baɖe ba tɩ ɖʊ atʊ gʊtɔ gɩshɛbʊ na taba atʊ bʊkɔ́ɩ kǝ ba na tɩ ashɩ ashee anii kʊŋɔn na kʊtʊr nɩ na ma.
GʊGʊ kaŋkulo n tɩ shee pɩ nsala na ɖʊ pɩ ɩkashɩ wàà, ba lêe koŋkaarɩ ashee atɩgɩkrǝ anii kʊŋɔn na kʊtʊr kaŋyɩɩ kʊceu. Gɩ ta cê mpá nɖǝn, ɩ sim ba naa ɖôo kʊyɔgʊ naa ɩ naa shêe kɩbafaŋaka gboo ɩkashɩ ba naa cê na kaŋa na pɩ ashee anii kagɩkrǝ kaŋyɩɩ kʊceu.
Aŋɔnka : FAFANA Mumuni