Na galaɩ ma, jamaa aŋunii kpataa, bapi laŋ, baŋono laŋ, n tɩ shee anyɩn nsala. Bashɩɖɩ kakɔmin aŋunii, n tɩ sala anyɩn.
Amafaawɩɩ nɖe n wʊɖa na yɛɛ ma lêe ashee anyɩn ma na gǝŋ :
Ɖaa gɩ ce bayarɩ bʊwalʊ ma, ɖaa ba jɩ ʊ ma, ɩɖe lee Nɩyɔɔrʊʊ kampá nɩ na gǝŋ, asiibi, yofo ‘aŋɔrɔ tǝb-n’ɩnyɩʊ kaja,’ʊshilé tǝb-na-ganaana kʊja, gaja kotoku-banyɩʊ-n’akoo-n’ʊɖǝn.
Naa ba ye sǝba ʊwalʊ ɖe, jamaa aŋunii nɖee ba cee yɔ balaŋ, wàà, ba tʊ̂ ʊwalʊ ɖe ma, ba kpa ŋkǝŋ na boŋo, n’ ʊwalʊ ɖe ʊ ye sǝba gɩshɛbʊ.
Basana tuutuuma ba pɩ ka ŋkǝŋ kʊshilé ɖe. Bayarɩ mbaɖee ba pɩ ŋkǝŋ ma, ba tǝ ɖaa aɖi akoo-na-tǝb-n’ɩnyɩʊ ma.
Ɩsuko baja, bayɛɛja, bacǝncǝrja, ɩbobo baja, bafalleeja, atʊ, kɔŋsɛɛtɩ baja gboo gɩ ɖa ŋkǝŋ.
Basǝmprǝ ba sǝba ka acǝr arɩ gʊcǝma. Bani ba boŋo ma, n’ ɩsuko baja gboo ba ɖoo acǝr arɩ gʊcǝma. Bani gboo ba boŋo ma, n’ ɩbobo baja ba ɖoo acɩ ɩbobo.
Ɩbobo baja ba boŋo ma, na bayɛɛja ba ɖoo afaŋa bagʊnyɛ. Bani banja ŋkǝm na atʊ, anii kaŋkulo kǝbaja, gɩ ɖoo alee kɔŋsɛɛtɩ ashee atɩgɩkrǝ anii kaŋyɩɩ kʊceu. Ɖaa gɩ ta naa lǝ̂ atɩgɩkrǝ anii, k’ ɩ sim gɩ naa cǝ̂kǝla n’ ɩkrǝ ɩfɔlɩ na ma. Atakɔŋsɛɛtɩ a lee ʊciŋkǝrka na ashee bɛrɛ baŋunii kʊshilé ɖe.
Gɩ boŋo ma, na baŋono ba ɖoo alǝ bʊlei : MAMMAM Sɛlkam, kɔmɩsɛɛ, Arɩjanna, Bashɩɖɩ kalogita kanɖiyar na baɖǝn acǝŋǝ…
Ba cam atʊ gɩsaná gɩshɛbʊ, ba kul ntɔ naa bɔɔ ʊjɩʊ, baa aŋa a ta jɩ̂ akun gɩshɛbʊ.
Ʊwalʊ ɖe ʊ lee ʊciŋkǝrka na ashee atʊ, ɖaa gɩ sǝba ʊ n’ alaafɩya, naa aboŋo n’ alaafɩya ma. N’ atʊwalʊ bʊja kotoku-banyɩʊ-n’akoo-n’ʊɖǝn ma.
Gaja ga tɩ̂ atʊ alaafɩya, naa apele atʊ ŋŋuro nlaŋlaŋa. Bʊja tuutuuma ɩ lêe atɩnyine nɩ. Batɔnɔka, Gaja ga lêe pɩ gaafara, Gaja ga câm bagɩsaná, ŋkǝŋ ɩ lêe bʊŋʊrʊ. Atʊ mbaɖee gɩ saa ma, Gaja ga kîɖe atʊ naa ashee baa aŋa na suuru.
Amʊnsala n tǝ baa aŋa na laŋ.
BƱKAARƖ SƱMAANƱ Abaasɩ