Gaja kotoku-banyɩʊ-n’akoo-n’ʊɖǝn, afɔ́nɔ̀ ‘aŋɔrɔ tǝb-n’ɩnyɩʊ kaja, ɩɖe tɩ lee anɔɔbʊnka kaŋɔrɔ, ‘ʊshilé akoo-n’ɩkolom na ba tine Bashɩɖɩ kʊwalʊ ɩshɩnyɩʊ-na-kulumi kʊja.
Kʊshilé ɖe, Limaamʊ, Mɛɛr, Prefee, ʊwalʊ kanɖiyar, Gʊpayarɩ, apele na Bashɩɖɩ kʊtǝnla ʊjala kǝbaŋono ba lǝ bʊlei na yɛɛ Bashɩɖɩ kaŋyɩɩ kʊceu. Basǝɖa bapur ba ɖoo n’apá ɩfɔlɩ apɩ ɖaa Gana, Nanjiiriya, Lʊmɛ, Kʊtɔnʊ, Kparakʊ, Jugu, bʊtǝna bʊfɔlɩ nɩ gboo apɩ tɩ jaŋ na Bashɩɖɩ kampá.
Basǝŋŋono baɖǝn ba ɖoo gɩcɩɩca akɔɔ na baa aŋa alaakaarɩ ɖooɖooɖo kayɔkɔloka laŋ. SIL kaŋkulo gboo n ɖoo abɔ baa aŋa alaakaarɩ ashee atɩgɩkrǝ anii kaŋyɩɩ kʊceu, atǝbʊlilǝka nɩ, gɩ pàá na cǝ̂kǝla gɩkrǝ gɩfɔlɩ na.
Ɩ lee ʊciŋkǝrka ʊbʊmbɔnɔ na ashee atʊ, anii kǝbapi, ɖaa gɩ sǝra awala ŋkǝŋ kʊshilé ɖe ma. Gɩ tɩ nyiŋǝ Gaja Gɩyarɩ Gɩbʊmbɔnɔyar a shêe atʊ ŋŋuro nlamaka gɩ naa wâla bʊja bʊja n’alaafɩya.
Aŋɔnka : ISIFU Rahinatu