Yofo ‘aŋɔrɔ ariutaja ʊshilé akoo-n’ɩriu kʊja gaja kotoku-banyɩʊ-n’akoo-n’ɩriu kʊja na Basombaja (Ditammari) ba lǝ wàà, ba tǝ ba lêe bʊwalʊ. Ŋkulo « Anii kaŋyɩɩ kʊceu » n laa bɛrɛ banyɩʊ ba cê n’ɩkrǝ tuutuuma kabɔ afǝlǝfǝlǝ.
Bʊkɔŋkɔŋɔ̀ cɩɩnɩ gajaka na ba cee lǝ wàà, ba tǝ ba sǝ̂ba, ama gɩ kpa ŋkǝŋ ma, ka gɩ wʊɖa ʊɖǝn na. Na gɩ sǝ ŋkǝŋ halɩ bʊkɔŋkɔŋɔ̀ tǝb-na-bʊnyɩʊ, kaŋkǝm n’ʊɖǝn a lǝ atʊ wàà, bʊkɔŋkɔŋɔ̀ bʊriu bʊ ba sǝ̂ba.
Bʊkɔŋkɔŋɔ̀ bʊriu bʊ kǝ ma, na gɩ kɔɔ ce, bʊkɔŋkɔŋɔ̀ bʊnan-na-gʊsaʊ kʊ bɛrɛ ba sǝba na ɖoo na gɩ ce atɩ wʊɖa awalaka bɛrɛ [organisateur].
Ʊni a lǝ ka atʊ wàà, alaamɩshɩ kʊshilé ɖe ʊ lee ka ʊshilé nɖee ba tîne ʊwalʊ ma. Ʊshilé ɖe na bɛrɛ ba ɖôo na bʊkǝmǝ apɩ atɩ fol mpá nɩ naa gaja ga ta kʊ̂ɖa, ba lêe ʊwalʊ.
Gɩ ɖoo ʊwalʊ kaaɖu ɖaa bʊkɔŋkɔŋɔ̀ bʊnʊn-na-gʊsaʊ gɩteŋshile ma, akɔɔ shɛʊ atɩntǝma nɩ. Gaja ga kʊɖa arɩsǝma kʊshilé yofo ‘aŋɔrɔ ariutaja ʊshilé akoo-n’ɩnan kʊja gaja kotoku-banyɩʊ-n’akoo-n’ɩriu na gɩ kɔɔ ce. Gɩ kpa ŋkǝŋ boŋo, na ba ye sǝba bʊwalʊ, atʊ gboo gɩ yala atabɔ gɩ toŋo ace na ma na ma cei. Gɩ ɖoo ŋkǝŋ ɖaa bʊkɔŋkɔŋɔ̀ bʊriu ma.
Gaja ga tǝ̂ n’atʊ bʊja tuutuuma.
