Asiibi afɔ́nɔ̀ ‘aŋɔrɔ anyɩʊtaja ‘ʊshilé tǝb-na-kulumi kʊja gaja kotoku-banyɩʊ-n’akoo-n’ɩnan nɩ na LIŊGO kɩɩgbɛ a ɖa ashee anii kagɩkrǝ kaŋyɩɩ kʊcǝu ma, a laa atǝbɛrɛ banan wàà, gɩ cê Bayaakʊ kampá nɩ.
Ʊshilé ɖe ʊ lee Bayaakʊ kampá kʊwalʊ ʊbʊmbɔnɔ kʊshilé ʊsǝbaka na ashee Babayaakʊja mbaɖee ba ɖa Bayaakʊ kampá nɩ ma, na mbaɖee ba ɖa apá ɩfɔlɩ nɩ gboo ma na.
Ʊwalʊ ɖe nɩ, gɩ ce ce gɩ tɩ faŋa Babayaakʊja bʊkɔ́ɩ LIŊGO kaŋkulo n sǝra alee gaja 2023 nɩ ashee atɩgɩkrǝ anii kaŋyɩɩ kʊceu ma. Ayɔkɔ nɖee gɩ toŋo ace na ŋkǝŋ ma na gǝŋ, atabʊpá nɖee gɩ cee wʊɖa ma, n’ɩfɔlɩ nɖee gɩ ɖoo na ma ma. Ɩfɔlɩ ɖe nɩ gǝŋ : Ɖaɖaa kɩjɩʊ kambʊpá, Afrika kaatǝna gabɔlɔka kagʊbɔ na Nɖulinya ŋŋunii mbɔlɔka kagʊbɔ.
Akulo akulo katǝma nɩ, na Bayaakʊ kasukuru ajala kaɖirɛtɛɛ a cam ʊwǝlǝ alǝ n’atǝganɔ wàà : « Ʊrɔŋ kanɖulinya nɩ, n’arɛ̀ k’a yɔ agɩkrǝ ba ŋʊm na nɩ ma, kʊŋɔn na kʊtʊr na, karɛ̀ k’a wʊɖa jirma na. Tam ɖǝn a taa tɩ́ pɩ̂, ba nǝ ba naa yɛ̂ɛ ba câm arɛ̀ gatǝnleeɖu gaɖǝn, shee ɩ jɩ̂ wàà, karɛ̀ a yɔ̂ ʊŋɔn n’ʊtʊr na agɩkrǝ. Baa arɛ̀ baa apaŋa na a kâra gayɛ acere agɩkrǝ naa apala bapur gboo ba cêre jɩ. Gɩ ɖʊ̂ gʊnyɛ akaŋa na LIŊGO kaŋkulo ashee anii kagɩkrǝ kaŋyɩɩ kʊceu. » Agalei ŋgaɖee a lǝ ashee Abayaakʊpi baa apaŋa ma na gǝŋ, ɩ lee ʊciŋkǝrka ashee atʊ páá, aɖʊwaa ba cam atɩŋkulo gɩsaná gɩshɛbʊ.
Gɩ ɖoo ŋkǝŋ ma, na gɩ ce gaɖuɩ basǝmprǝ ba wala na cǝr ma. Ŋkulo baa mpaŋa n ɖoo acǝr acǝma asʊ̀rá asʊ̀rá na gɩ yʊga bʊbʊkǝli mbʊɖee bʊ na faŋa anii kɩkɔɩ kʊkpatɩ gaja 2024 ma.
Gɩteŋshile gɩ kpa ma, na gɩ pɩ afal.
GBAGBAƉOHUŊ Bilal Elisee