Yofo ‘aŋɔrɔ anantaja ‘ʊshilé tǝb-n’ɩnan kʊja na Bayaakʊ kǝbaja ba wa alee bʊwalʊ gaja kotoku-banyɩʊ-na-tǝb-na-ganaana kʊja. Ʊwalʊ ɖe nɩ, Bayaakʊ kǝbapi ba shɩ ɖa na bʊɖu ma, ba lee koŋkaarɩ apɩ atɩ jaŋ na bawor.
Ʊwalʊ k’ʊ lal n’ʊjaŋ kanɖǝnɖǝn na, aɖʊwaa ba sǝ atǝn ayɛɛ bampá kaŋyɩɩ kʊceu naa ayɛɛ ɩnyɩŋca ashee ɖaa ba lêe naa ɩnawɩya mbaɖee ba ɖa na pɩ ma, ba fâa. Ʊyɛɛyɛʊ nɩ, ba tɩ́ na ŋǝ wàà, babapi ba ɖa ʊyɔʊ kasukuru abʊmbɔnɔ nɩ ma, kǝ ba na lee bʊkɔ́ɩ bʊ sim ba naa lêe ʊwalʊ katam ɖaa ba na pɩ Bayaakʊ ma na.
Atʊ, GʊGʊ kaŋkulo, ɖaa baa gaja gapaŋa gɩ na ce ɩwalʊ ɖe anii kapá nɩ ma, gɩ ce ŋkǝŋ gboo. Ba ta cam atʊ gɩsaná gɩshɛbʊ naa ashee atʊ ʊwǝlǝ gɩ lee faawɩɩ ashee atɩgɩkrǝ anii kaŋyɩɩ kʊceu.
Ʊwalʊ ɖe nɩ ŋkǝŋ, gɩ laa atabʊpá ɩfɔlɩ afaŋa bɛrɛ mbaɖee ba pɩ ʊwalʊ ɖe nɩ ma.
