Ɩshilé nɖe nɩ, afɔ́nɔ̀ ‘aŋɔrɔ tǝb kaja nɩ na gɩ boŋo ataGʊGʊ ɖe. Katam, ɩ lee ʊciŋkǝrka na ashee atʊ, gʊ ta tɩ́ ɖoo ɖaa wáá ma. Aɖʊwaa ɩgbɛ baɖǝn ba tɩ yɛɛ ba lee ɖaa gǝŋ ma, kǝ ba na sǝra na, ba ta sǝ̂ba baɖe ba tɩ far.
Naa atʊ gɩ sǝra alee halɩ atɩ kpa nɔmba tǝb kaja ma, na gɩ lǝ wàà, gɩ tɔ̂ɔ nɩ ɖaa jɩŋgaarɩ kaja ma. Ɩ ta kîɖe ncǝn gboo, a fǝlǝ cei. Aɖʊwaa ɩŋoŋo na gʊkɔrɔ, ɩ lee ka galei ŋgaɖee ga ɖa ncǝn awu ma.
Ɩ ɖa wàà, ka gɩ na sǝra na laa nɩ were were na, ama yɔ̂ ma wàà, a naa ɖâ ntǝma nɩ. Ʊyɔʊ n’ayɔkɔyɔka ɩ ɖa ncǝn, ɩfaawɩɩ bapǝlmǝ pɩ. Galaŋ lêe ma koŋkaarɩ atʊr nɩ naa ɩ jɩ̂ kaaŋfaanɩ.
A ɖa gboo ɖaa ʊcǝpǝrʊjala ma, ɩ tɩɩ sǝ̂ra akpa ɛntɛrnɛɛtɩ nɩ gaɖuɩ ba na yɩɖa wàà, Plee Stɔɔr ma, nɩ akǝ alaa aɖʊ anyɩnɩnyipi nɩ na tʊr.
https://play.google.com/store/apps/details?id=org.sil.gugu010a.blo
GʊGʊ kaŋkulo n tɩ sala anyɩn.
Aŋɔnka : ISIFU SƱMAANƱ Mustafa