Afɔ́nɔ̀ ‘aŋɔrɔ ariutaja ‘ʊshilé akoo-n’ɩnan kʊja ʊ lee ka Nshem kaɖaɖaa kʊwalʊ. Na SIL Bashɩɖɩ kaŋkulo nsaʊ nɖǝn n ce atɩ ŋǝ ɖaa Nshem kǝbapi ba wala baɖaɖaa kʊwalʊ ma.
Ʊshilé ɖe gɩ ta Bashɩɖɩ akpa Nshem kampá nɩ ma, na gɩ mana wa na gʊpayarɩ ‘abɔŋɔnja. Ŋkǝŋ na a toŋo atʊ ace na gʊyà agaɖu. Baŋunii ba cam atʊ gɩsaná gɩshɛbʊ, naa ashee atʊ ʊjɩʊ gɩ jɩ, naa aye ɖoo afǝl ʊwalʊ kaaɖu. Ŋkǝŋ ba shee atʊ atagǝrma naa afaŋa atʊ bʊɖusǝka ; atɩ àtó ashee atʊ gɩ nyem ɩ ta jɩ̂ wàà, bʊtunyem bʊ kpa atʊ.
Ba sǝba ʊwalʊ ma, babʊlilǝka nɩ, ba tɩ laa na faŋa wàà, ɩ sim baɖe ba wʊ̂ɖa ganɔ gaɖɔŋkɔnɔ naa baɖe ba sǝ̂ra aɖa fɛɛ. Kʊshilé ɖe na ba pɛmpɛŋɛ gʊpayarɩ atɩ mboi laŋ na bagatǝna kanɖiyar aganɔ. Ɩ lee ʊciŋkǝrka ʊbʊmbɔnɔ na ashee Nshem kampá kǝbɛrɛ baŋunii, anyɔnna atʊ SIL Bashɩɖɩ kaŋkulo ŋŋunii nɖee n ce ma.
Kaŋja ŋkǝm, ba cǝr acǝrá tuutuuma ɩ na faŋa atʊ ɖaɖaa ma. Ɩ san n’atʊ páá. Gaja ga kpâ n’atʊ gaja gafɔlɩ.
