Afɔ́nɔ̀ ‘aŋɔrɔ akolontaja ‘ʊshilé ʊnʊntaja gaja 2023 na anii kaŋkulo nɩ kǝbaja ba ce gʊna Kpeinyaa agaɖu, atɩ ɖoo na ɖaɖaa kɩjɩʊ kambʊpá. Kʊshilé ɖe, ŋkulo ŋŋunii n ɖa ka ŋkǝŋ. Mbʊpá nɖe, ɖaa ba laa njɩ ma, tam a lama boŋo, ama k’ɩ n cee ɖoo were na. Aɖʊwaa mbʊpá nɖe ŋŋunii na kɩfoto ba wʊɖa ɩkɔla nɩ. Ɩ ta lêe ɖaa gǝŋ ma, kajabʊpá k’ɩ na ɖoo were ɖaa ɩsaaka ma na.
Ʊshilé ɖe, bʊkɔŋkɔŋɔ̀ cɩɩnɩ-na-gʊsaʊ kʊ ŋkulo n kpa gʊna Kpeinyaa agaɖu. Naa ba ye kpâ ŋkǝŋ, gʊna Kpeinyaa gboo n’abaja baɖe ba wala boŋo asǝ na saa ŋkulo nɖe. Baa maakɔ nɩ ɩ sǝba gɩshɛbʊ.
Bʊkɔ́ɩ laŋ ba laa mbʊpá ma na gǝŋ wàà, ɖoo kɩjɩʊ ɖe k’ɩ kɔɔ yɔgɔ na. Baa maakɔ ɩ fʊba ma, bɛrɛ ba tɩ nyir ɖaɖaa laŋ. Ama ayɔkɔ ɖe ɩ ta ɖâ gʊbɔ nɩ, baa ɩ lǝm baɩ na, k’ɩɩ lîi na. Ʊrɔŋ ɖaɖaa kɩjɩʊ ɩɖǝn ɩ ɖa, ba ta yɩ̂ɖa kaŋyɩɖa ashee baɖǝn, shee karɛ̀ a taba na yɛɛ a yɔ̂ kabʊkɔ.
Mbʊpá nɖe kaaŋfaanɩ na gǝŋ acǝŋǝ wàà, arɛ̀ a ta sɔ̂lɔ na yɛɛ a yɔ̂ koo na yɛɛ a lêe ɖaɖaa kʊjɩʊ ʊɖǝn, a naa kʊ̂n ɖaa ba paɖapaɖa mbʊpá nɩ ma gɩshɛbʊ, a taa sǝ̂ra alee ʊ.
Ʊwalʊ ɖe ʊ lee ʊciŋkǝrka na ashee samaa aŋunii kʊshilé ɖe, aɖʊwaa mbʊpá kalaabaarʊ a pala bɛrɛ ba lige tam ɖǝn nɩ laŋ. Kaŋkǝm basǝmprǝ ba cǝr acǝrá ɩɖǝn alige ɖoo laŋ. Basoro gboo ba cǝr bɩja. Kaŋkǝm gʊna Kpeinyaa n’aŋkulo ba lee mbooɖakala ajaŋ na samaa. Baa aŋa a kǝm cei cei akiɖe.
