Pour des instructions en français cliquez ici.
Atǝbatʊrka,
GʊGʊ kaŋkulo n tɩ shee anyɩn nsala na lǝ wàà, ayɔkɔ ɩsoŋsono ɩ ɖa ashee gɩkrǝ anii kʊŋɔn na kʊtʊr kaŋyɩɩ kʊceu.
Ʊcǝpǝrʊjala ɖǝn, gɩ na yɩɖa wàà, apilii ma, ʊ ɖa Guugǝl Plee Stɔɔ (Play Store) nɩ, ʊni na ba na yɩɖa wàà, Afrika Stoori Buuku (African Story Book).
Afrika Stoori Buuku ɖe a lee ɛntɛrnɛɛtɩ kaafala (sitwɛb) ŋgaɖee nɩ ɩkrǝ tuutuuma kabʊpá ɩ ɖa ma na. Ŋkǝŋ na gɩ na kpa na bɔ abʊpá ɩjala ɩɖǝn na cǝpra n’atɩgɩkrǝ anii. Gɩ lee koŋkaarɩ abɔ abʊpá ɖaa ɩshikolom na kaŋkǝm ma boŋo, acǝpra na atɩgɩkrǝ anii akɔɔ na ɩshɩnan na kaŋkǝm aɖʊ ncǝn.
Ɛntɛrnɛɛtɩ kaafala gaɖe ga lee ka ʊcǝpǝrʊjala nɖee nɩ ɩ nɩɩ sǝ̂ra akpa abɔ abʊpá ɖe aɖʊ anyɩnɩnyipi nɩ na tʊr ma.
Arɛ̀ a ta naa yɛ̂ɛ abʊpá ɖe, a pǝ̂kɩl Plee Stɔɔ laŋ akpa ncǝn.
A ta kpâ ncǝn, aɖe kîɖe kanɖi laŋ, gaɖuɩ ba na yɛɛ yɛɛ n’ayɔkɔ ma, …
… naa aŋɔn African Storybook koo asb reader naa ayɛɛ. A taa ŋǝ̂ ɩcǝpǝrʊjala tuutuuma ncǝn, aɖe pǝ̂kɩl nɖee ʊ jɩ wàà, Africa Story Reader ma laŋ, abɔ.
A ta bɔ̂ boŋo, aɖe tîne.
A ta tîne, katǝntǝn a taa ŋǝ̂ ba ŋɔn (LIBRARY – EXPLORE) ma. Aɖe pǝ̂kɩl EXPLORE laŋ naa asaa ɩ tîne.
Ɩ ta tîne, aɖe kîɖe kanɖi laŋ na gʊnyɩsono naa apǝkɩl gɩculupi laŋ.
Ŋkǝŋ, a taa ŋǝ̂ ɩkrǝ tuutuuma. Ɩkrǝ ɖe nɩ, aɖe pǝ̂kɩl anii laŋ.
A ta pǝ̂kɩl gǝŋ, ɩ tɩɩ pɩ̂ n’anii kabʊpá na kɩnɔmba. Aɖe pǝ̂kɩl mbʊpá nɖee a na yɛɛ ma, kanɔmba laŋ naa asaa cei.
A ta lêe gǝŋ, ɩ tɩɩ bɔ̂ mbʊpá nɖe aɖʊ ashee nɩ.
Ɩ ta ɖôo wáá, ɩ tɩɩ sǝ̂ra atʊr nnyǝmǝ. Naa ɩ ye tʊr, pǝ̂kil foto ɖe na ce na gʊnyɩpɛnɛ, ʊ taa ŋǝ̂ wàà, mbʊpá nɖe n tɩ tine.
Baa maa karɛ̀ k’a kɔɔ tɩ́ wʊɖa ʊɖoŋu [connection] na, a taa sǝ̂ra atʊr abɔ nɖee a bɔ ma, faala.
A ta naa yɛ̂ɛ a ŋǝ̂ abɔ nɖee a bɔ ma, aɖe kîɖe atǝntǝn naa apǝkɩl LIBRARY laŋ. Ŋkǝŋ na abɔ nɖee a na bɔ apilii ɖe nɩ ma, ɩ na ɖa.
A ta pǝ̂kɩl EXPLORE laŋ, abɔ nɖee a bɔ boŋo ma, ɩ na faŋa ɩculupi kaɖi ɩ sasa atǝn gɩsǝna gɩjala gɩɖǝn laŋ ma na. Abʊpá nɖee k’ɩ wʊɖa ɩculupi ɖe na ma, ɩni nɩ gǝŋ nɖee k’a kana bɔ na ma.
Arɛ̀ a ta bɔ̂ abʊpá n’ɩ yɔgɔ yɔgʊʊ, n’a na yɛɛ a fâa ɩ ashɛr, nɖi laŋ gaɖuɩ ba ŋɔn EDIT ma, n’a pǝ̂kɩl.
A ta pǝ̂kɩl, ɩɖe fʊba aŋɔn DONE naa naa afaŋa kúlúkúlú baránà mbaɖee ba na faŋa ʊshɛr ma, abʊpá ɩŋunii laŋ. Aɖe pǝ̂kɩl mbʊpá nɖee a na yɛɛ a shɛ̂r ma laŋ, ɩɖe shɛ̂r.
Gǝŋci ɩ kʊ̂n naa anyɩnɩnyipi ɩ wʊ̂ɖa abʊpátʊrka tuutuuma ncǝn.
Lêe ma koŋkaarɩ abɔ gʊkamakama kabɔ ɩsoŋsono Afrika Stoori Buuku nɩ n’àtó ɩsoŋsono na kamakama na ma baa njǝŋ.
