Na galaɩ ma, jamaa aŋunii kpataa, bapi laŋ, baŋono laŋ, n tɩ sala anyɩn. Bashɩɖɩ kakɔmin aŋunii, n tɩ shee anyɩn nsala.
Amafaawɩɩ nɖe n wʊɖa na yɛɛ ma lêe ashee anyɩn ma na gǝŋ, ɖaa ba jɩ Bafolaŋɩ [Guiguisso] kʊwalʊ ma. Ɩɖe lee arɩsǝma, yofo ‘aŋɔrɔ ariutaja, ʊshilé akoo-n’ɩnʊn, bʊja kotoku-banyɩʊ-n’akoo-n’ɩnyɩʊ.
Basana ba pɩ ʊwalʊ ɖe gɩshɛbʊ, Bakoɖowarɩja, Babɔrɔkɔja, Saramaŋga kǝbaja, Bacelija, Bafalagarɩja, Bashɩɖɩ kǝbaja, n’atʊ anii kaafala gabʊmbɔnɔ kǝbaja gboo.
Naa ba ye sǝba ʊwalʊ ɖe, na ce ɖaa bʊkɔŋkɔŋɔ̀ bʊnan na gʊsaʊ ma, kaja tam ɖe basana baŋunii baɖe ba kpa ŋkǝŋ boŋo.
Bacǝncǝrja ba sǝba gʊcǝma na jaŋ n’ʊwalʊ.
Ʊŋono Rasak a yiɖe ka gɩcɩɩca atoŋo mikroo na shee laabaarʊ kabʊlei. A boŋo ma, n’ʊŋono Mʊŋkɛɛla Alɛɛ, Bafolaŋɩ kʊwalʊ na bayifala bamboi kanɖiyar, a ɖoo acam ʊwǝlǝ. Aŋkǝm na, Abusko a ɖoo acam ʊwǝlǝ, a lee ka bayifala bamboi kanɖiyar Bashɩɖɩ ʊpacine nɩ atɩya.
A boŋo ma, n’atʊ anii kaafala gabʊmbɔnɔ kǝbaja gɩ ɖoo ashee jamaa aŋunii nsala, naa akal na pɩ na ŋgaɖee gɩ toŋo ace na ma, ashee atɩgɩkrǝ kaŋyɩɩ kʊceu ma. Ɩ lee ʊciŋkǝrka ashee pɩ. Ɩ san n’atʊ gboo ɖaa baa aŋa na a sɔlɔ atɩgɩkrǝ anii kaŋyɩɩ kʊceu ma.
Bacǝncǝrja ba tǝwǝ gʊcǝrá, bʊpɔɔ baja ba tɩ fʊ bʊpɔɔ, bani pɩ ba na yɩɖa wàà, jeŋjembu baja. Baa aŋa na a faŋa ‘ʊyɔʊ nɖee a yɔ ma.
Bafolaŋɩ kampá, Gaja ga tɩ̂ njɩ alaafɩya, naa alama ataŋuro, gaja gafɔlɩ basana ba yɔ̂gɔ awu wáá.
Bʊja tuutuuma bʊ lee atɩnyine nɩ.
Amʊnsala n tǝ̂ baa aŋa na laŋ.
BƱKAARƖ SƱMAANƱ Abas