Atana Kpeinyaa a yɩɖa ka atɩŋkulo wàà, gɩ pɩ̂ atɩ jaŋ n’aɖe naa ajɩ ɖooɖooɖo kʊjɩʊ ɖǝn agafala nɩ.
Arɩsǝma afɔ́nɔ̀ ‘aŋɔrɔ anʊntaja ‘ɩshilé tǝb-na-kulumi kʊja nɩ na gɩ ce atana ɖe agaɖu atɩ ŋǝ ɖaa ba na lee ɖooɖooɖo kʊjɩʊ ba na yɩɖa wàà, kparayɔbɩ ma. Ɖooɖooɖo kawaacɩ́ na gǝŋ. Ɩɖe tɩ lee anɔɔ n’aca nɩ ba na man abɔɔ, ɩɖe pɩl apra ʊjɩʊ ʊsaŋka ɖe.
Gɩ ce gʊna Kpeinyaa gaɖu n’atǝbasana mbaɖee ba ɖoo na Gamalɩkatǝna apɩ atǝgatǝnleeɖu ba câm ʊyɔʊ ma. Gɩ faŋa pɩ ɖooɖooɖo kakparayɔbɩ ɖe, na ɖooɖooɖo kayɔkɔsʊra ɩɖǝn. Gɩ faŋa pɩ ɖaa ba na lee ʊjɩʊ ɖe ma. Gɩ boŋo ma, na gɩ ɖʊ ʊjɩʊ ɖe ashee pɩ, na gɩ man ajɩ ʊ aŋǝ ɖaa ʊ ɖa ma.
Gɩ boŋo ma, n’atayà ba na yɩɖa wàà, Papa Ɔŋkoo ma, a tɔɔ pɩ atɩ faŋa ɖooɖooɖo kacɩncaŋa ɖǝn.
Ʊshilé ɖe ʊ lee ʊciŋkǝrka kʊshilé na ashee atʊ. Gɩ tɩ shee atana Kpeinyaa n’aŋkulo nsala ashee bʊkɔ́ɩ ba lee ashee atʊ ma
Ataɖaɖaa gɩ yɔ̂ nɩ.
