Arɩsǝma, asiibi n’alahaɖɩ ɩ lee ka ɩshilé ɩriu nɖee Bafolampi ba wa asǝ atǝn na yɛɛ bampá kaŋyɩɩ kʊceu ma. Ba tine bʊwalʊ ɖe arɩsǝma ba sala sǝmaa aɖur ma, na ce ɖaa bʊkɔŋkɔŋɔ̀ bʊriu gɩshilikɔnɔ ma. Naa ba ye tine bʊwalʊ, ba yɩɖa Bashɩɖɩ kɩkàràkárà kaɖi baja baɖǝn pɩ, ɖaa Mɛɛr, Bashɩɖɩ kagʊpayarɩ, limaamʊ, ɩɖelegee na bɛrɛ tuutuuma bafɔlɩ baɖǝn…
Bʊwaʊ ɖe, ʊ lee kpatakɩɩ na ashee pɩ, aɖʊwaa ŋkpalá ŋkolontaja njɩ gǝŋ ba na wa ma. Ʊshilé ʊsǝbaka ɖe, naa ba ye tîne bʊwalʊ, ba sǝba n’ʊnyiŋu na. Balfaja ba sǝ atǝn aceu Kʊraana ashee bampá. Ba ɖoo gɩcɩɩca gboo ma, ʊnyiŋu na ba tine n’ʊwalʊ.
Ba boŋo ʊnyiŋu ma, na ba lee ɩfaawɩɩ mbaɖee ba na caarɩɩ pɩ ma. Ɩfaawɩɩ baɖe ba lee ma, kǝbaɖǝn pɩ gǝŋ : Bampá kʊnyɩŋca kʊpɛmpɛŋʊ, bafaŋaka basoŋsono basukuru nɩ, bʊto bʊsoŋsono bʊ naa ɖâ na shee pɩ baa saa apaŋa na, aɖʊwaa ɩ tɩ pɩ̂ tam ɖǝn bapɔmpɩ a na tɩ na wʊɖa nawɩya ma. Ba saŋ kɔɔ sɔlɔ wàà, ʊba a lîge balaŋ na fǝtǝla.
Ba kǝ bɔl Bafolaŋɩ katɛɛrɛŋ nɩ, acǝrá acǝrá tuutuuma afǝlǝfǝlǝ. Ba yɩɖa atʊ GʊGʊ kaŋkulo gboo bʊwalʊ nɩ, ama kǝ ba tɩ sǝra akʊn alkawɩlɩ nɖee laŋ gɩ ce ŋkǝŋ ma na. Gani jɩ gǝŋ wàà, kǝ ba shee atʊ ganɔ gɩ lee atafaawɩɩ nɖee gɩ ce na ma ma na, aɖʊwaa ba lee ma, ba lama yɔgʊʊ. Ama bʊwalʊ ʊ san gɩshɛbʊ, ka gɩ lee nshɩŋyɔ na, aɖʊwaa ŋŋuro n ta ɖa gajɩfɔlɩ, k’ɩɩ kɔɔ ɖâ gǝŋ na.
Gɩ ŋǝ wàà, k’ɩ ɖoo na basul na. Ʊshilé ʊriutaja ʊto a caarɩɩ pɩ, kǝ ba sǝra alee acǝrá nɖee ba nyaʊ wàà, ba tǝ ba lêe ma na.
Babɔl ɖe ba kǝ ashee ʊwalʊ ma, Bashɩɖɩ kabɔl kaŋkulo nɖee ba na yɩɖa wàà, »Diable rouge » ma, a taa ka kagʊjɔɔ, Ajegulɛ na gǝŋ.
Ʊwalʊ ʊ san gɩshɛbʊ, Gaja ga kpâ n’atʊ gajɩfɔlɩ !
