Boɖi kʊwalʊ gaja kotoku-banyɩʊ-n’akoo-n’ɩnan kʊja

Aɖɩtɛnɛɛ afɔ́nɔ̀ ‘aŋɔrɔ anyɩʊtaja ‘ʊshilé akoo kʊja na atʊ anii kaafala gabʊmbɔnɔ nɩ kǝbɛrɛ baɖǝn gɩ ce Boɖi kampá nɩ.

Atʊceu gɩ ce ma, ɩɖe lee Boɖi kʊwalʊ na gɩ ce ɖaa gaja baa gapaŋa gɩ na ɖoo na ce anii kapá ɩŋunii nɩ ma na. Ʊceu ɖe ʊ na pala gɩ na laa gatǝnleeɖu kɩlaabaarʊ na shee bɛrɛ baŋunii. Ɩ ta jɩ̂ wàà, gɩ wʊɖa abʊpá ɩfɔlɩ, atʊ gɩ ɖoo na ma afaŋa pɩ.

Gakoloŋ, gɩ laa Benɛɛ kaatǝna gabɔlɔka kagʊbɔ afaŋa bɛrɛ mbaɖee ba ɖa ʊwalʊ nɩ ŋkǝŋ ma, alaa Garɩɖontǝna gabɔlɔka afaŋa pɩ naa alaa ɖulinya kaatǝna gabɔlɔka afaŋa pɩ. N’anii kagɩkrǝ jɩ gɩ lee n’ayɔkɔ ɖe ɩŋunii.

Ɩ ta san na bɛrɛ mbaɖee ba ɖa ʊwalʊ ɖe nɩ ma, baŋunii, aɖʊwaa bɛrɛ tuutuuma kǝ ba cee yɔ wàà, n’atɩgɩkrǝ anii gɩ wʊɖa ayɔkɔ ɖaa gǝŋ ma na.

Atʊ gboo ɖaa atʊkpaʊ nɩ ba cam atʊ ma, ɩ kǝr atʊcine gɩshɛbʊ.