Afɔ́nɔ̀ ‘aŋɔrɔ anyɩʊtaja ‘ʊshilé tǝb-na-ganaana kʊja, gaja kotoku banyɩʊ-n’akoo-n’ʊɖǝn GʊGʊ kaŋkulo n cam acǝncǝrja ɖǝn n’aŋkulo gɩsaná, atǝgatǝnleeɖu Bashɩɖɩ ŋkǝlǝ̀ Ajegulɛ. Basana baɖe, ba ɖoo na Gafɔntǝna kaatukǝltǝna ba na yɩɖa wàà, Guwaɖeluupu [Guadeloupe] ma, nɩ apɩ Garɩɖontǝna nɩ atʊgʊsaʊ atɩya.
Bʊkɔ́ɩ bʊ lee kpatakɩɩ ashee bʊpɩʊ ma na gǝŋ, ɖooɖooɖo kapicǝra. Acǝrá ɖe, ɩɖǝn ɩ tɩ li. Bapi tuutuuma kǝ ba yɔ ɖaa ba na cǝr acǝra ɖe ma na, shee acǝra ɖe kayɩɖa nɩ ba na rǝŋǝ, kǝ ba yɔ ɖaa ba na cǝr ɩ ma na.
Ŋkulo nɖe n sɔlɔ n ŋǝ̂nǝ apicǝra ɖe. Ba tɩ wala apicǝra ɖe apá nɖe nɩ ba na lee bantǝma ma. Ba tɩ pɩ na bagʊsaʊ kacǝrá gboo na cǝkǝla n’ atʊgʊsaʊ atɩya kɩja. Ɩni nɩ ba na wala ɖaa jɩŋgaarɩ ashee apicǝra ma, na cǝr.
Gaja ga shêe pɩ sáà ba sǝ̂ra alee ntǝma nɖe ɖaa ɩ sim ma naa asǝra aŋǝnǝ apicǝra ashee bapi.
BABABƆƉƖ SAALIFU Nuhum