Alaamɩshɩ afɔ́nɔ̀ ‘aŋɔrɔ ariutaja ‘ʊshilé tǝb-na-ganaana kʊja, gaja kotoku-banyɩʊ-n’akoo-n’ʊɖǝn n’ ayɔkɔlǝŋja ʊsǝmprǝ Fera Rǝǝm [Vera Röhm] , Jaama kaja a para GʊGʊ kaŋkulo ntǝma wàà, ba kʊ̂ɖa galei gaɖǝn na gɩkrǝ anii.
A para ntǝma nɖe nɔɔ n’ɩkrǝ kotoku-banyɩʊ.
A lee ntǝma nɖe nɖǝn boŋo, kanɖawa nɖe n ɖa ɖaa ɩkiipu ma.
Gɩkrǝ baa gɩpaŋa gɩ wʊɖa kakiipu.
A tɩ kpeɖe nnyɩʊtaja kʊleu, atɩgɩkrǝ anii gɩ ɖâ ncǝn. Ʊleu ʊfɔlɩ kanɖawa njɩ gǝŋ ɖaa bʊnyɩŋcapiri ma, n’ɩbii ɩpiɖepiɖeka pentiɖono laŋ. Kʊshemulaŋ na gǝŋ ɖaa ɩmɛta banyɩʊ ma.
Ntǝma nɖe na gɩfɔŋkrǝ : [La nuit est l’ombre de la terre]. Gɩ kʊɖa na gɩkrǝ anii. Ŋkulo kʊyɛʊ nɩ, na gɩ kal fǝtǝla na kiɖe gatǝna kʊrɩʊ asǝr akal.
Na gɩ na ri bʊlei bʊnan.
Gasǝbaka : Gɩjibɔŋɔ gɩ ɖa gatǝna kʊnyǝŋkrǝ nɩ na.
Ganyɩʊtaja : Gɩjibɔŋɔ gɩ ɖa gatǝna kaŋkomo nɩ na.
Gariutaja : Gɩjibɔŋɔ gɩ lee gatǝna kaŋkomo njɩ.
Ganantaja : Gɩjibɔŋɔ gɩ lee gatǝna kansaʊ nɖee kɩ n tǝŋǝ ʊshilè ma na.
Ʊtaŋʊtaŋʊ nɩ na gɩ ri galei ganantaja ashee galei ŋgaɖee gɩfɔnɔ gɩ lǝ ma.
Gaja ga pâla atɩgɩkrǝ gɩ cê ŋyɩɩ awu ɖaa wáá ma.
BABABƆƉƖ SAALIFU Nuhum