Arɩsǝma afɔ́nɔ̀ ‘aŋɔrɔ tǝb-n’ʊɖǝn kaja ‘ʊshilé tǝb-n’ɩnyɩʊ kʊja na ɩgbɛ ba na yɩɖa wàà, SIAŊSƆN [SIA’ NSON] a yɩɖa atʊ ʊwalʊ ataMɛɛrii kafala nɩ. Ama ʊwalʊ ɖe k’ɩ lee ɩgbɛ ɖe agɩlopí gɩ shee ka atʊ kabɔ na. Mɛɛrii na ba fǝl na ma, ayɩɖa atʊ ʊwalʊ ɖe, aɖʊwaa ʊwalʊ ɖe kaalei ga lee kpatakɩɩ ma laŋ.
Ʊwalʊ ɖe ba yɩɖa atʊ ma, na wàà, SIAŊSƆN kɩɩgbɛ a wʊɖa ka tamaa na yɛɛ ba fâŋa atǝma n’anyɛ baja atɩkrǝ ba ŋʊm n’atʊ kʊŋɔn na kʊtʊr. Ɖaa ga ɖa ma, na wàà, atǝma n’anyɛ baja ba ta yɔ kʊŋɔn na kʊtʊr na bɩkrǝ ba ŋʊm na pɩ ma, ɩ tɩɩ ɖâ pɩ sooci ba sǝ̂ra na faŋa bacerecereka na bɩkrǝ.
Laŋ na, ɩ jɩ wàà, ɩgbɛ ɖe a ta na yeeyee n’ɩtǝnlajala na lee ɩwalʊ na lǝ na shee bɛrɛ ɖaa ga sara naa ba câm ɩgbɛ mbaɖee ba na lee atɩkrǝ ba ŋʊm n’atʊ ma, kʊfaŋʊ katǝma ma. Ba ta câm ɩgbɛ nɖee a naa lêe kantǝma ma boŋo, ʊni aɖe câm bafaŋaka gboo.
Naa ba câm bafaŋaka, shee ɩ jɩ wàà, ba lêe bɛrɛ mbaɖee ba ce sukuru awʊɖa abɔ ma. Gʊbɔ ŋgʊɖee afaŋaka a sim awʊɖa ɩ ta jǝ̂ba kpataa ma na gǝŋ, gʊbɔ ŋgʊɖee ba na yɩɖa na gɩfɔŋkrǝ wàà, Bee-Pee-See [BEPC] ma.
Gɩ ta Mɛɛrii nɩ ma, n’ɩgbɛ ɖe kǝbɛrɛ banyɩʊ mbaɖee ba pɩ atɩ lee n’atʊ faawɩɩ ɖe ma, ba pɩ atɩ jeɖe atʊ anii kagɩkrǝ kaafala gabʊmbɔnɔ nɩ Bashɩɖɩ ʊpacine. Ba kpa ma, gɩ toŋo pɩ afaŋa ɖaa bʊɖuɩ gɩ na lee atatǝma n’atǝnsʊra nɖee gɩ wʊɖa ma. Naa ba ye ɖoo atǝgatǝnleeɖu ashɛʊ, ba laa afaŋa atʊ ɖaa ɩ lee ʊciŋkǝrka ashee baɖe ma, naa akɔɔ lǝ atʊ wàà, baɖe ba tǝ ba kɔ̂ɔ tɩ pɩ, aɖʊwaa na baɖe gɩ tɩ gɩ lêe ayɔkɔ tuutuuma.
Bɛrɛ banyɩʊ baɖe pɩ gǝŋ : Ʊsǝmprǝ ba na yɩɖa wàà, ORU ƉƱARU Tukɔsanɔ ma, n’ʊsoro ba na yɩɖa wàà, SERO KOBI Abubakarɩ ma. Ʊŋono SERO KOBI Abubakarɩ, ʊni a lee ɩgbɛ ɖe karɛ̀ nɖee a ɖa ashee atǝma ɩleeka kʊnyaʊ ma na gǝŋ.
