Atɩgɩkrǝ kʊwalʊ Lʊmɛ

Gaja 2018 kaŋɔrɔ 3ja, n’amʊ n’aŋkul TSASKƐ Martɛɛŋ, gɩ ce Lʊmɛ. Baa mpá mpaŋa jɩ gɩ man ace, gɩ tɩ jeɖe Anii kǝbaja, aɖʊwaa gɩ tɩ yɛɛ ba yɔ̂ abɔ tuutuuma SIL kaŋkulo n ɖoo na ma na gɩkrǝ anii ma.

Gɩ wa na Basǝɖa kǝbaŋono arɩsǝma aŋɔrɔ 3ja ‘ʊshilé 2ja akpeɖe alahaɖɩ kʊwalʊ. Ba cam atʊ gɩsaná gɩshɛbʊ.

Ʊwalʊ kʊkpeɖu

Alahaɖɩ aŋɔrɔ 3ja ‘ʊshilé 4ja, gɩ ce ŋkǝlǝ̀ Agoe atɩ jeɖe Basǝɖa bʊwalʊ. Gɩ sǝba bʊkɔŋkɔŋɔ̀ cɩɩnɩ ɖeiɖei.

Gɩ faŋa pɩ atabʊpá ɩŋunii nɖee gɩ laa n’anii kagɩkrǝ ma, ɖaa apǝrǝ kabʊpá, anii kɩɩbii kabɔ ɩnyɩʊ n’asǝ asǝ kafaawɩɩ kagʊbɔ gɩ na yɩɖa wàà, GʊGʊ ma. Na gɩ faŋa pɩ atɩgɩkrǝ kayɔkɔ ɩsoŋsono gɩ kpeɖe ashee atǝncacaʊ kɩnyipi ma, ɖaa akɔ́lɩ ɩsoŋsono gɩ togo WasAp laŋ n’ɩcǝpǝrʊ ɩjala ɩ wʊɖa anii kabɔ n’ɩfoto n’ɩwǝlǝcamka ma.

Basoro baŋkulo

Bɛrɛ baɖǝn ba cee ŋǝ ayɔkɔ ɖe boŋo, ama bɛrɛ tuutuuma kǝ ba kana yɔ ɖaa anii kagɩkrǝ gɩ ce ŋyɩɩ ma, na.

Gɩ faŋa pɩ anii kɩɩbii ɩŋunii na gɩ man atʊr abɔ ɩbʊmbɔnɔ ɩɖǝn. Bɛrɛ ba shɩ abʊpá ɩɖǝn gboo. Ɩ san n’atʊ ɖaa bɛrɛ ba sɔlɔ atɩgɩkrǝ kaŋyɩɩ kʊceu ma, na ɖaa ba cam atʊ gɩsaná gɩshɛbʊ ma.

Basǝmprǝ baŋkulo

Na ce ɖaa bʊkɔŋkɔŋɔ̀ tǝb-n’ʊɖǝn ma, na gɩ boŋo naa atǝbǝ ace Balampǝla bʊwalʊ nɩ gboo.

Stɛfani TSASKƐ

Laisser un commentaire