Gaja kotoku-banyɩʊ-na-tǝb-na-cɩɩnɩ kaŋɔrɔ anyɩʊtaja ‘ʊshilé tǝb-n’ʊɖǝn kʊja na gɩ fʊba atǝgatǝnleeɖu gɩ na yɩɖa wàà, « Anii kagɩkrǝ kaafala gabʊmbɔnɔ » ma, kɩkpaakʊ.
Bʊkɔ́ɩ bʊ pala gɩ fʊba ɩkpaakʊ baɖe ma na wàà, gafala gaɖe kɩkpaakʊ ba sǝba na lul boŋo. Gɩ ta lǝ̂ wàà, gɩ kɛ̂ɛshɩɩ ɩkpaakʊ baɖe ba lee ntǝma, aɖʊwaa tam nɖee gɩ na kaɖa ɩkpaakʊ baɖe na fʊba bafɔlɩ ma, baŋono baɖe ba tɩ lee bʊja akoo ɖoo ɖaa ba cǝ gafala gaɖe ma. Gǝŋ ma, ɩkpaakʊ baɖe ba kpa gɩŋono boŋo, gɩ ta kɛɛshɩɩ n’arɛ̀ nɖee ba ŋʊm halɩ a tɩ wʊɖa bʊja akoo ma, k’a kɔɔ lee ʊpi na.
Ɩ lee ʊciŋkǝrka ashee atʊ mbaɖee gɩ na lee ntǝma gafala gaɖe nɩ ma, aɖʊwaa k’a gɩ kɔɔ na lee shika bʊto kʊlul atatǝma kayɔkɔ laŋ na.
