Mɛɛr n’abakǝŋja bʊjeɖu – Atǝgatǝnleeɖu kɩlaabaarʊ

Arɩsǝma nɖe kʊshilé, afɔ́nɔ̀ ‘aŋɔrɔ tǝb kaja, ‘ʊshilé akoo-na-cɩɩnɩ kʊja, gaja kotoku-banyɩʊ-na-tǝb-n’ʊɖǝn na ataMɛɛr TAASƱ SAKARƖ Sulkibiru n’abakǝŋja ba jeɖe atʊ atanii kaafala gabʊmbɔnɔ nɩ.

Gajaka gaɖe jɩ a yɩɖa atʊ alǝ wàà, aɖe tɩ yɛɛ a pɩ̂ atǝgatǝnleeɖu atɩ sala ŋkulo. Ɩ jɩ wàà, atacaŋkɔ ɩ shɩ na tine tine baa sáà apaŋa na ashee bɛrɛ ma, na gɩ lǝ nɩ wàà, fɛɛ na, a taa sǝ̂ra apɩ.

A tʊ ma, n’a toŋo n’abayifala banyɩʊ ; ‘abɔŋɔnja abʊmbɔnɔ ba na yɩɖa wàà, ƉOROGI ABUƉU Maliki ma, na nɖee a ɖa ashee ɩlaabaarʊ ma, áŋyɩ̀ɖa njɩ SƱMAANƱ Nabiu.

Ba kpa ma, na gɩ cam pɩ aka atʊgʊmaŋgʊyo kaamana. Ŋkǝŋ na gɩ sǝ alee ɩfaawɩɩ mbaɖee ba ɖa ma.

‘Ʊwǝlǝcamka nɩ na a na lǝ wàà, ŋgaɖee laŋ baɖe ba jeɖe atʊ ma, k’a wu baɖe bansala ashee atʊ aɖʊ koŋkaarɩ nɖee gɩ na lee na shee atɩgɩkrǝ anii kaŋyɩɩ kʊceu ma na. Ɖaa gɩ na lo atǝbawor ma laŋ, ɩ lee ɖoole ashee baɖe gboo ba jêɖe atʊ naa atʊgʊsoro gʊ tǝ̂wǝ na ce, baɖe ba tɩ sala atʊ páá. Gɩ boŋo faawɩɩɩ ma, na gɩ toŋo pɩ akpa na ŋku, naa afaŋa pɩ atatǝma kayɔkɔ.

Ɩ lee ʊciŋkǝrka na ashee atʊ ɖaa a sɔlɔ agɩkrǝ gɩ cê ŋyɩɩ ma, naa a san n’atʊ ɖaa a lige atalaŋ gboo wàà, baɖǝn ba ɖa na cɩ gɩkrǝ anii kɩbobo ma. Ɖaa wáá ma, ɩ lee ɩkashɩ ɩ ɖʊ ka nɩ arɛ̀ laŋ. Gaja ga pâla gɩ sǝ̂ra atǝwǝ gǝŋ naa naa rǝŋǝ n’atǝbawor ɖaa ɩ sim ma.

Aŋɔnka :
ISIFU SƱMAANƱ Mustafa