Anii kaafala gabʊmbɔnɔ kaŋkulo n kpeɖe kɔŋsɛɛtɩ ashee ARACKAA na ARƉABs kagajɩkalka kɩwalʊ ɩbʊmbɔnɔ.
Kɔŋsɛɛtɩ ɖe atɩ lǝ atʊ ɖaa Gʊyà Asǝŋkǝlaka Anʊntaja, Koɖifʊaa kaja, a tǝm atǝmka Gʊyà Alaŋlaŋa Ganaana kaja sul na yɩɖa nɩ wàà, a pɩ̂ atɩ kaŋa n’ aɖe ajɩ bʊnyaʊ bʊkǝuka àlaŋ kajɩŋgaarɩ ma.
Kɔŋsɛɛtɩ kʊkpeɖu na kʊceruceru
Atʊga n’ akar ba lee ka kɔŋsɛɛtɩ ɖe kakoŋkaarɩ páá, galaŋ na gɩ sǝra alee kɔŋsɛɛtɩ ɖe ɖaa ɩ sim ma. Ba yʊga baa aŋa na na agaɖu ŋgaɖee a naa yîɖe naa alǝ bʊlei ma. Gʊyà acɔɔmɩ ariutaja n’ agaɖuyiɖeka, cɔɔmɩ anyɩʊtaja n’ agaɖuyiɖeka, cɔɔmɩ asǝbaka n’ agaɖuyiɖeka. Gʊyà bakar gboo ba sǝ atǝn, Gʊyà Asǝŋkǝlaka Anʊntaja, Koɖifʊaa kaja, ‘atǝmka a sǝla Gʊyà Alaŋlaŋa Ganaana kaja ‘ɩcɔɔmɩ na bakar laŋ ma, naa a ye kpa Gʊyà Alaŋlaŋa Ganaana kaja n’ akalkanama sul na alaabaarʊ nɖee apɩ na ma na ma.
Ayɔkɔkaraka
Ʊga n’ akar ba lee ka koŋkaarɩ ashee ayɔkɔkaraka, akuro nɖee kɔŋsɛɛtɩ baja ba kara ma, ʊga a ce ka atɩ shɩ. Tɩɩla nɖee a pɔɔ kɔŋsɛɛtɩ kayɔkɔkaraka ma, ISIFU SƱMAANƱ Iɖiriisu agatǝnleeɖu jɩ Niu Bluu Star [New Blue Star].
Ʊceruceru
Akpala tuutuuma na gɩ cerecere kɔŋsɛɛtɩ ɖe…
… naa aye ce ARACKAA kʊwalʊ asiibi anɔɔbʊnka kaŋɔrɔ ‘ʊshilé tǝb-na-ganaana kʊja.
Gɩ kɔɔ ɖoo n’ ʊwalʊ akpa ma, atalaata kʊshilé na gɩ lee YuTuub kafiɖiyoo.
ARƉABs 2021
Ʊrɔŋ alahaɖɩ anɔɔbʊnka kaŋɔrɔ ‘ʊshilé akoo-n’ɩkolom kʊja na ba tine ARƉABs kʊwalʊ, ɩshɩnyɩʊ-na-kulumi kʊja. Ʊwalʊ ɖe nɩ, na SIL kaafala gabʊmbɔnɔ kaŋkulo n lee kɔŋsɛɛtɩ na faŋa bɛrɛ ɖaa ɩ sim gɩ naa lǝ̂ atɩgɩkrǝ gɩshɛbʊ, gɩ pàá na cǝkǝla n’ ɩkrǝ ɩfɔlɩ na ma.
Ataya Gʊyà Aciibaa Anyɩʊtaja na bayarɩ bayarɩ tuutuuma ba sǝ ka atǝn, ataMɛɛr n’ abakǝŋja, ataPrefee n’ abakǝŋja, ʊwalʊ kanɖiyar Ásìyá Arɩjannatu n’ abakǝŋja, basana ba ɖoo n’ apá afǝlǝ fǝlǝ ma, na samaa tuutuuma baɖe ba sǝ na ɖʊ gʊtɔ na kiɖe atakɔŋsɛɛtɩ na kǝɖa anyɛ.
Gɩ boŋo ma, bɛrɛ tuutuuma baɖe ba tɩ kʊma SIL kaafala gabʊmbɔnɔ kaŋkulo ɖaa ba sǝra alee koŋkaarɩ akpeɖe kɔŋsɛɛtɩ n’ atɩgɩkrǝ anii apɩ atɩ kǝr na samaa aŋunii bɩcine ma. Ɩ lee ʊciŋkǝrka ʊbʊmbɔnɔ na ashee atɩmpá kaɖi baja na samaa tuutuuma ashee atɩgɩkrǝ kaŋyɩɩ kʊceu.
Ɩ ta jɩ̂ wàà, k’ ɩ kana kiɖe kɔŋsɛɛtɩ ɖe na, ɩ tɩɩ sǝ̂ra apǝkɩl mbɔlɔ nnɖe.
AKPAƉO CABƖ Jabaarʊ Moyiis