Gaja kotoku-banyɩʊ-n’akoo-n’ʊɖǝn afɔ́nɔ̀ ‘aŋɔrɔ kulumi kaja ‘ʊshilé akoo-n’ɩnyɩʊ kʊja nɩ na anii kaŋkulo kaɖi baja ba ce Jugu.
Bʊɖuú nɩ, ba sala Ɖɔŋga kʊtǝnla kɩkrǝŋɔnka na kʊtʊr katǝma kaɖi baja [Direction d’Alphabétisation] gboo.
TSASKƐ Martɛɛŋ a cee lee ntala ŋkǝka kaŋkpatɩlɛŋɛ nfɔlɩ ashee anii kagɩkrǝ, ɩɖe tɩ lee ntǝma ayofotala nɩ na nɖee ba na yɩɖa wàà, « Winɖows » ma. Ʊ taa sǝ̂ra akǝ ɩwǝlǝ kɩkɔɩ (ʊwǝlǝtaaka ́ , ʊwǝlǝburoka ̀ n’ʊwǝlǝtʊka ̂ ) were na ŋkpatɩlɛŋɛ nfɔlɩ nɖe.
Ama a lee koŋkaarɩ gboo aɖʊ Benɛɛ kɩkrǝ ɩŋunii, kɩɩbii ɩŋunii aŋkpatɩlɛŋɛ nɖe laŋ. Galaŋ, ŋkpatɩlɛŋɛ nɖe laŋ na ba nǝ ba sǝ̂ra akǝ Benɛɛ kɩkrǝ ɖe ɩŋunii.
Ɩ lee bɔkɔɩ beriu gɩ rǝŋǝ wàà, ɩkrǝ kʊŋɔn kaɖi baja Jugu kǝ ba wʊɖa ŋkpatɩlɛŋɛ na kǝ na Benɛɛ kɩkrǝ bayofotala laŋ na ma. Atʊjeɖu ɖe nɩ, na TSASKƐ Martɛɛŋ a faŋa pɩ aŋkpatɩlɛŋɛ nfɔlɩ naa ataba pɩ wàà, ba tɩ yɛɛ njɩ aa ? N’ɩ san na pɩ na ba lǝ wàà, ba tɩ yɛɛ njɩ. Na ba ɖʊ ŋkpatɩlɛŋɛ nɖe bayofotala ɩnyɩʊ nɩ kpaarɩ.
Ɩ lee ʊciŋkǝrka ashee atɩŋkulo, aɖʊwaa ɩkrǝ kʊŋɔn kaɖi baja ba tǝ ba sǝ̂ra akpeɖe abɔ ashee ɩkrǝ tuutuuma nnyǝmǝ. Gɩ tɩ sala pɩ.
