Asiibi yofo ‘aŋɔrɔ anyɩʊtaja ʊshilé tǝb-na-ganaana kʊja, gaja kotoku-banyɩʊ-na-akoo-n’ɩriu na gɩ ce Boɖi. Boɖi kǝbapaja baŋunii na mbaɖee ba ɖa bɛrɛ bapá nɩ ɖaa Kʊtɔnʊ, Kparakʊ, Gana, Lʊmɛ… naa ata apɩ ma, ba ɖoo. Samaa ɖe aŋunii a wa Boɖi kampá nɩ na yɛɛ ajaŋ na mpá.
Mpá ŋŋunii n ɖa jɩŋgaarɩ nɩ, aɖʊwaa baa aŋa a kpa awʊɖa ʊwor n’alaafɩya. Bapi laŋ, baŋono laŋ, bayifala na bapigii ba cɩ, akara bayɔkɔ ɩsoŋsono na jaŋ na Boɖi kampá. Acǝma ɩ sǝba, akulo asʊ̀rá asʊ̀rá ɩ ɖoo, ŋkulo baa mpaŋa na kayaaye. Baŋunii bakuro ɩ sim na pɩ, acǝm ʊŋǝu. Ba na cǝr cǝr na saa bawor halɩ akulo ɖe ɩŋunii ɩ tɩ́ boŋo.
Acǝma kaŋkǝm Boɖi kǝbayifala ba ɖoo acɩ ɩbobo samaa nɩ gɩcɩɩca afaŋa banyɛ. Ɩ lee ʊciŋkǝrka ashee mpá n’atʊ mbaɖee gɩ ta atɩya ace ma. Aɖʊwaa ba cam atʊ gboo gɩsaná gɩshɛbʊ. Gɩ ɖoo gɩcɩɩca alǝ ŋgaɖee gɩ toŋo ace ma, naa afaŋa samaa abʊpá ɩyalaka. Kaŋkǝm na gɩ yʊga samaa bʊbʊkǝli mbʊɖee bʊ na faŋa wàà, anii kaŋkulo n fʊba ŋyɩɖa ma.
Gɩteŋshile laŋ na mpá kǝbayifala ba kɔɔ wa bɔl katɛɛrɛŋ abʊmbɔnɔ laŋ akamakama na bɔl ajaŋ na bampá.
Gaja ga tɩ̂ mpá nɖe gboo alaafɩya. Mbaɖee ba ta na bɛrɛ bapá apɩ ma, Gaja ga pâla ba kɔɔ kpâ n’alaafɩya.
UMOORU Alijannatu