Asiibi yofo ‘aŋɔrɔ anyɩʊtaja ʊshilé akoo-n’ɩnʊn kʊja, gaja kotoku banyɩʊ-n’akoo-n’ɩriu, ɩɖe tɩ lee Bayaakʊ kʊwalʊ kʊshilé ʊboŋoka na gǝŋ.
Gɩ ta atɩya gajaka na ce ɖaa bʊkɔŋkɔŋɔ̀ cɩɩnɩ ma, afǝl Bayaakʊ. Gɩ kpa ŋkǝŋ gajaka gaɖe ma, ba wʊɖa ʊwalʊ ɖǝn basukuru nɩ, na gɩ sǝba ace ŋkǝŋ n’atayɔkɔɩ gɩ toŋo ma. Maakɔ nɩ ba wa sukuru ɖe nɩ ashee ?
Ba na yɛɛ yɛɛ ba tɩ̂ mboi ashee bampá kʊwalʊ kaŋyɩɩ kʊceu. Na ba lee koŋkaarɩ alaa bʊwalʊ kanɖiyar n’abakǝŋja mbaɖee ba sim wàà, ba taa tôŋo mpá gɩshɛbʊ ma. Ba boŋo gani ma, ɩɖe tɩ lee ɖaa bʊkɔŋkɔŋɔ̀ bʊriu-na-gʊsaʊ gɩshilikɔnɔ ma. Naa baa aŋa a yee ɖoo sukuru ɖe nɩ, gɩ ɖoo ŋkǝŋ ayʊga samaa atǝbʊbʊkǝli mbʊɖee bʊ na faŋa wàà, anii kaŋkulo n fʊba ŋyɩɖa ma. Kaŋkǝm, gɩ faŋa pɩ abʊpá ɩyalaka, naa acam bɛrɛɩ ba sɔlɔ ba naa câm akɔ́lɩ n’atɩgɩkrǝ anii arɩsǝma baa apaŋa batǝncacaʊ kɩnyipi laŋ ma, bɩnɔmba.
Ŋkǝŋ kaaja ga bon ma, na baa aŋa a wa gʊcǝrá kaaɖu. Bʊkɔŋkɔŋɔ̀ bʊnan bʊ kǝ ma, baa maakɔ ɩɖe sǝba gɩshɛbʊ. Samaa aŋunii basoro ba cǝm, basǝmprǝ ba cǝm, gʊcǝrá kaaɖu ga cǝm abɔɖɔ. Baa mʊ ɩ ɖa fɛɛ. Ba ŋono gatǝna na bʊto naa ntuli n pàá na sǝ̂u bɛrɛ na. Akulo ɩŋunii ɩ ɖoo. Gʊpayarɩ gʊ ɖoo, abakǝŋja ba tǝr aŋkǝm na wu nɩ gʊsǝrǝ.
Gʊcǝrá gʊ san. Basǝmprǝ batulo ɩ san ʊrǝŋu. Ɩɖe tɩ taa samaa aŋunii na ɖoo na gɩcɩɩca. Aɖʊwaa batulo nɩ, ba tɩ nyiŋǝ na shee Bayaakʊ kampá, na shee bɛrɛɩ ba wala gʊcǝrá nɩ ma. Ɩɖe kɔɔ lee atulo nɖee ɩ na kal na samaa afaŋa ɩsoŋsono ma. Atulo kǝbayɩɖaja, bagǝŋgǝŋǝkǝja baŋunii ba ta ŋǝ gʊjɔɔ ɖaa ɩ sim ma. Baa aŋa a ɖa ʊciŋkǝrka nɩ, na nyiŋǝ alaafɩya na shee bawor.
Bʊkɔŋkɔŋɔ̀ bʊnʊn bʊ kǝ afǝl ma, na gɩ ɖoo Bayaakʊ ŋkǝŋ apɩ Bashɩɖɩ atɩya.
Gaja ga kpâ n’atʊ gajɩfɔlɩ.
