Atʊŋono ɖǝn, baɖǝn bapal, baɖǝn bayà na gǝŋ, ʊŋono Ɩɖriisu Seibu áŋyɩ̀ɖa nɖee ba yɔ na nɩ ma na gǝŋ, Baaba. Na Jaama kagʊsaʊ kʊ a ɖa. A lee arɛ̀ nɖee a na lee koŋkaarɩ na shee atɩgɩkrǝ anii ma na ; n’a sɔlɔ wàà, gɩ naa fâŋa anii ɖe Wasaapʊ kaŋkulo nɖǝn nɩ.
Mʊ pala ka a pɩ na gʊfaŋa gʊɖe ? Atʊŋono ɖe a tɩ lǝ wàà, ʊshilé ɖǝn na aɖe a sǝ afaŋa wàà, ɩ sim baɖeɩ ba ɖa gayofotǝna naa awʊɖa bapi ŋkǝŋ kǝ ba ɖa Bashɩɖɩ na ma, ɩ sim ba cêre bagɩkrǝ, naa baa rǝ̂ŋǝ jɩ naa ayɔ jɩ kʊŋɔn na kʊtʊr. Aɖʊwaa ɩ lee takaashɩ abʊmbɔnɔ na ashee arɛ̀ɩ k’a cere agɩkrǝ na ma. Galaŋ na aɖe a sɔlɔ wàà, bapi mbaɖee ba ŋʊm yofo ampá nɩ ma, ba yɔ̂ atɩgɩkrǝ anii, ɩ lee riiba abʊmbɔnɔ na. A tɩ ŋǝ wàà, anii kʊpi k’a sim a lûgo agʊlɔ na.
Atʊŋono ɖe, a lee koŋkaarɩ ashɩ anii kabɔ nɖee gɩ wʊɖa ma, ɩŋunii n »ɩtanɩ ; a sɔlɔ agɩkrǝ ma laŋ na a lee gǝŋ.
Gɩ sǝba ʊfaŋʊ ŋkulo nɖe nɩ ɩ tɩ ce gaja gapǝlmǝ boŋo. Gaja 2023 kaŋɔrɔ asǝbaka nɩ na gɩ sǝba.
Atʊfaŋʊ ɖe nɩ, gɩ ŋǝ wàà, baɖǝn ba tɩ lee koŋkaarɩ abʊmbɔnɔ ʊtʊr nɩ, gǝŋci atʊŋono ɖe gboo a wʊɖa koŋkaarɩ ashee atɩgɩkrǝ kaŋyɩɩ kʊceu. Gɩ tɩ sala nɩ n’abaja mbaɖee ba ɖa ŋkulo nɖe nɩ ma. Na koŋkaarɩ ma.
Aŋɔnka : IBRAHIM INUUSA Malookiya