Ʊrɔŋ ɖaa bʊja akoo na kaŋkǝm ma na gǝŋ, anii kǝbatǝnleeja ba ɖa koŋkaarɩ nɩ ashee anii kaŋyɩɩ kʊceu ma. Gɩkrǝ gɩɖe kǝbatǝnleeja ba wʊɖa atǝma asʊ̀rá asʊ̀rá, naa awʊɖa aleu tuutuuma gboo na lee. Gɩ ta tɔ̂ɔ ɖaa ɩwalʊ katam kaalei ma, gaja ga ta kâl, ba tɩ ce bʊpapiri bʊɖǝnɖǝn nɩ, mbʊɖee bʊ na lǝ anii ma. Ba ta kpâ kaapapiri nɩ, ba na ɖoo ɖoo ʊwalʊ nɩ gbagbaraa afaŋa koŋkaarɩ nɖee ba na lee ashee anii kabʊcǝma ma, ashee samaa nɖee a sǝ na kiɖe pɩ naa naa ɖʊ pɩ gʊtɔ ma. Bʊpapiri bʊɖe gboo kǝbaja ba yɔ wàà, ŋkulo nɖǝn n ɖa Bashɩɖɩ ashee gɩkrǝ kabaamaakɔ. Ɩ pala ba ta kpâ kaapapiri nɩ, ba na cam pɩ gɩsaná gɩshɛbʊ.
Gakoloŋ Kulumi na ba ce, ɩɖe lee Anii kabʊpapiri kǝbayarɩ bʊwalʊ kʊshilé. Ba kpa ŋkǝŋ ma, na ba faŋa bʊyɔʊ, naa alee kɔŋsɛɛtɩ ɖǝn nɖee a tɔɔ ɖaa anaŋa tǝb-n’ɩnʊn ma. Kɔŋsɛɛtɩ ɖe a na kal na bɛrɛ pɩ afaŋa tuutuuma. Anii kaŋkulo ŋŋunii n ce ka Kulumi kʊshilé ɖe.
Baɩ na kɔŋsɛɛtɩ ɖe a sara ? Ba tɔɔ tɔɔ ɖaa gʊyá nɩ na ba ɖa ma, aɖʊ ʊtanʊ na yɛɛ ba shɩ nɖulinya kayɔkɔ ɩsoŋsono ashee gaja kʊboŋu. Ayɔkɔ ɖe kʊyalʊ́ k’ʊ lee na gɩtanɩ na. Afaŋa nɩ bayalaka ba na kal na bashɩka. Aɖʊwaa gɩ ta tɔ̂ɔ ɖaa ŋŋuro nlamaka, koŋkaarɩ na fɛɛ kʊɖaʊ ma, k’ɩ lee gɩtanɩ gɩ na shɩ ɩ na. Gʊfaŋa ŋgʊɖee kɔŋsɛɛtɩ a na kal na samaa ma na gǝŋ.
Ŋkulo n na ce ma, n toŋo n’abʊpá ɩyalaka ɩɖǝnɖǝn atɩ yala ŋkǝŋ. Ba boŋo ma, na ba yʊga bʊbʊkǝli bʊɖǝn ashee samaa. Abɔ ɖe ɩ na faŋa wàà, ŋkulo nɖe n fʊba ŋyɩɖa. Gɩ tɩ lige samaa wàà, abʊpá ɩyalaka ɖe, ɩ ɖa anii kaafala gabʊmbɔnɔ nɩ atɩya.
Aŋɔnka : UMOORU Alijannatu