Arɩsǝma kʊshilé yofo ‘aŋɔrɔ ariutaja ʊshilé tǝb kʊja na gɩ ce Penesul kakoloji nɩ atɩ faŋa sukuru kǝbapi ɖaa ba na ŋɔn na tʊr naa naa lǝ atɩgɩkrǝ anii kaɖeiɖei ma.
Gɩ kpa ŋkǝŋ ma, bapi banyɩʊ pɩ gɩ wʊɖa sukuru nɩ, ama ɩ tɩ lǝ wàà, ɩ kǝ bʊkɔŋkɔŋɔ̀ bʊnan ma, na bapi ba kpa tuutuuma.
Ɩ lee ʊciŋkǝrka na ashee atʊ ɖaa bapi baɖe ba lee koŋkaarɩ na tʊr anii ma, na gɩ lǝ pɩ ɖaa ʊba a tɔɔ niya wàà, atɩgɩkrǝ gɩ na lǝ ma, katǝma ɩ tɩɩ ɖôo caacaa nɖee ba na yɩɖa wàà, BAAK [BAC] ma nɩ. Galaŋ ba lêe koŋkaarɩ na cerecere atɩgɩkrǝ anii naa ɩ pàá tɩ́ tûlo pɩ caacaa katam na.
Na gɩ sǝba n’anii kɩɩbii kʊtʊr, kaŋkǝm na na bapi gɩ man atʊr anii kabʊpá ɖǝn. Gɩ ŋǝ alǝ wàà, bapi baɖe ba lee koŋkaarɩ páá, galaŋ gɩ tɩ nyiŋǝ atǝbaya n’atǝbana wàà, ba naa na ɖʊ̂ bapi ɩkashɩ naa ba lêe koŋkaarɩ ashee atɩgɩkrǝ kʊceruceru.
