Arɩsǝma afɔ́nɔ̀ ‘aŋɔrɔ tǝb kaja kʊshilé akoo kʊja na anii kaŋkulo nɩ kǝbaja baɖǝn ba ce Boɖi ashee ʊfaŋʊ. Ɩɖe tɩ lee IBRAHIM INUUSA Malookiya, ISIFU SƱMAANƱ Mustafa n’UMOORU Alijannatu na gǝŋ.
Gɩ ta atɩya bʊkɔŋkɔŋɔ̀ tǝb-na-gʊsaʊ. Gɩ kpa Boɖi ma, na gɩ sǝ aŋʊra naa asala Gaja. Kaŋkǝm na gɩ fǝl sukuru koloji nɩ. Bʊkɔŋkɔŋɔ̀ bʊriu bʊ kǝ gɩshilikɔnɔ ma, na gɩ sǝba ntǝma.
Basukurupi tuutuuma ba pɩ, basoro laŋ, basǝmprǝ laŋ. Ba yɔgɔ atǝ bɛrɛ ɩshɩnan ma, na gɩ yʊga pɩ aku ɩnyɩʊ nɩ. Ntǝma n sǝba gɩshɛbʊ. Basukurupi baɖe nɩ, baɖǝn ba toŋo abɔ nɖee nɩ ba cam ntǝma aɖʊ ma. Baɖǝn kǝ ba toŋo na.
Gɩ sǝba n’ʊligu n’anii kɩɩbii. Mbaɖee ba cee yɔ ma, ɩ lee pɩ were ʊtʊr nɩ. Mbaɖee ba lee bafɔlɩ ma, bani gboo ba tʊr gʊbɔ gʊɖe. Kaŋkǝm gɩ tʊr abʊpá ɩjala ɩɖǝnɖǝn ashee pɩ. Baɖe gboo ba tʊr bagɩlopí.
Bɛrɛɩ ba toŋo ɩtanɩ ma, ba shɩ anii kɩɩbii kabɔ. Baa maakɔ ɩ sara gɩshɛbʊ. Ŋkǝmprǝ n mana, aka kʊɖuú fɔɩfɔɩ ʊ mana. Bʊkɔŋkɔŋɔ̀ bʊnʊn bʊ kǝ gɩteŋshile atǝr anaŋa ɩtʊrka ma, na gɩ yiɖe ntǝma naa alee atǝbawor baabaɩ anyiŋǝ alaafɩya ashee nfɔlɩ kʊwaʊ.
UMOORU Alijannatu