Afɔ́nɔ̀ ‘aŋɔrɔ kulumi kaja nɩ, ayifala ba na yɩɖa wàà, Grɛgori KƆSTANSO ma, a kʊn ‘afaŋaka ba na yɩɖa wàà, Ɖebora MƆRTƆN ma, apɩ Benɛɛ nɩ Bashɩɖɩ ashee ʊyɛʊ atɩgɩkrǝ anii nɩ. Ayifala ɖe ‘ʊkpaʊ nɩ Bashɩɖɩ, a lǝ wàà, anii gɩpɛnɛlaŋja na gɩpenesulja na aɖe a na yɛɛ wàà, aɖe a tâba ayɔ ɖaa ɩ ɖa ma.
Gɩ taba nɩ wàà, ɖulinya aŋunii nɩ, ɩkrǝ ɖaa ɩkotoku bakolom ma, ɩ ɖa ka. Maakɔ laŋ na ɩ pɩ wàà, atɩgɩkrǝ anii na aɖe a ŋǝ wàà, a tɩ yɛɛ a cerecere ayɔ ɖaa gɩ na sara ma ?
N’a na laa na faŋa atʊ wàà, baɖe ba ɖa sukuru abʊmbɔnɔ nɩ Amalɩka ma, bʊkɔ́ɩ aɖe ‘afaŋaka Ɖebora a na lǝ na shee baɖe ashee gɩkrǝ anii laŋ ma, ɩ kǝr ka aɖe ‘ʊcine.
Gani kaŋkǝm, aɖe lee sáà acerecere ɩkrǝ tuutuuma ɖaa Amalɩka gʊnyɩsonolaŋ kagʊsaʊ kɩja ma, ama aɖe k’a kana lee sáà acerecere Garɩɖontǝna nɩ kagɩkrǝ gɩɖǝn ayɔ na. Ɩ pala ka na aɖe a ŋǝ wàà, ɖaa Ɖebora a na laa anii kagɩkrǝ kabʊcǝma na faŋa baɖe ma, ɩ sim aɖe gboo a pɩ̂ atɩ cerecere jɩ.
Gɩ kɔɔ taba nɩ acǝŋǝ wàà, a lee ɩkrǝ kacerecereka na, maakɔ na a ŋǝ Anii kagɩkrǝ nɩ ɩ cǝm na nɩ ?
Na wàà, ɩɩŋ, aɖe lee ɩkrǝ kacerecereka na. Aɖe ‘ʊceruceru nɩ, aɖe tɩ ŋǝ wàà, ɩkrǝ kʊtɔjʊ ʊ lee kpatakɩɩ ashee arɛ̀, ɩ pala ka na aɖe a lǝ wàà, aɖe a pɩ̂ atɩ kaŋa n’Anii kǝbaja gboo atɔjɩ bagɩkrǝ.
Aɖe ‘ʊyɛʊ nɩ, aɖe ŋǝ wàà, gɩpɛnɛlaŋja kʊleu ʊ cǝm, ama ɩ wʊɖa bʊlei tuutuuma bʊ na fʊbafʊba ʊlǝu nɩ ma. Baa tam apaŋa na kʊlǝu. Ama k’ɩ lee wàà, bʊlinyaʊka nɩ gɩpɛnɛlaŋja gɩ fǝlǝ na gɩsǝɖa awu gǝŋ na, bʊlipi bʊ shɩ ka na fʊba.
Aɖe k’a kana ŋǝ koo atɩ ashɩ gɩshɛbʊ ɖaa ɩ na sara ma na, ama aɖe naa ɖa ʊyɛʊ nɩ. Ɩ tɩɩ sǝ̂ra atɩ pɩ wàà, k’ɩ lee aɖe a naa tɩ́ ŋǝ̂ ɖaa ɩ na sara ma, gɩshɛbʊ na. Ama aɖe ‘ʊyɛʊ ʊsǝbaka nɖe ʊ tǝ ʊ sǝ̂ra atɩ kaŋa na bayɛɛja bafɔlɩ ba sǝ̂ra aŋǝ ayɔ ɖaa ɩ tǝŋǝ na sara ashee gɩpɛnɛlaŋja kabʊlinyaʊka nɩ ma.
Aɖe tɩ sala GʊGʊ kaŋkulo ŋŋunii ashee ʊcam nɖee ba cam aɖe ma.
Aɖe tɩ shee Stɛfani n’ʊkúr Martɛɛŋ nsala naa naa sala Mumuni na Malookiya gboo ashee ʊkaŋʊ na ma nɖee ba kaŋa n’aɖe ashee ʊyɛʊ ʊɖe nɩ ma.
FAFANA Mumuni