ARƉABs gaja 2023 kʊwalʊ gɩ lee ma, baa aŋa a ɖoo ayiɖoo. Baŋono baŋono ba ɖoo asǝ jirma kʊsǝʊ. Atǝbaja mbaɖee ba ɖoo na apá ɩfɔlɩ apɩ ma, ba ɖoo asǝ na jirma.
Naa ba ye tine ʊwalʊ, Gʊyà Aciibaa 2ja a sǝba ka atine ʊwalʊ. A boŋo ma, na limaamʊ a nyiŋǝ ashee mpá. Kaŋkǝm na ARƉABs kanɖiyar a cam ʊwǝlǝ asala basana na mbaɖee ba lee koŋkaarɩ ashee ʊwalʊ kabʊcǝma ma. Atǝbaja ba ɖoo n’apá ɩfɔlɩ ma, ba cam ʊwǝlǝ alǝ ŋgaɖee ba wʊɖa ma.
Na basǝmprǝ ba cam ʊwǝlǝ asǝba gʊcǝrá gɩɖǝnɖǝn halɩ aboŋo. Ba ɖoo na ɖaɖaa kɩjɩʊ afaŋa atʊ na yala na ma. Mbaɖee kǝ ba cee yɔ ɩjɩʊ ɖe na ma, baɖe ba tɩ shɩ na yɛɛ ba ŋǝ̂ ɖaa baŋono ba bʊŋa jɩ ɩjɩʊ ɩŋǝrǝ ma.
Atɩŋkulo LIŊGO n ɖa ashee atɩgɩkrǝ anii kaŋyɩɩ kʊcǝu ma, n ɖoo afaŋa atǝma asʊ̀rá asʊ̀rá gɩ lee ma, ashee mpá. Kanɖee ba ɖoo na ma, afaŋa bɛrɛ ma na gǝŋ, ɖoo kɩjɩʊ kabʊpá na gatǝna gabɔlɔka kagʊbɔ.
