Anii kaafala gabʊmbɔnɔ ga tɩ sala anyɩn. Na koŋkaarɩ ma ! Ʊrɔŋ kʊshilé gɩ tɩ gɩ lǝ̂ anyɩn ɖaa atǝgatǝna Benɛɛ kantulo n ŋǝ ʊshilé n’atɩgɩkrǝ anii ma.
Gɩ tɩ lǝ anyɩn wàà, ataya nɖee ba na yɩɖa wàà, AMAƉU Aɖam ma, aŋyɩɖa nɖee ba yɔ na nɩ ma na gǝŋ Papa Ɔŋkoo, a pala ka ʊrɔŋ ntulo nɖe n ŋǝ ʊshilé.
Ama atɩgɩkrǝ anii kaafala gabʊmbɔnɔ nɩ kǝbɛrɛ ba lee ka koŋkaarɩ acǝpra ntulo nɖe gɩfɔŋkrǝ nɩ apɩ na anii kagɩkrǝ nɩ. Atalaata yofo ‘aŋɔrɔ anyɩʊtaja ‘ʊshilé ʊkolontaja gaja kotoku-banyɩʊ-n’akoo-n’ɩnan na ŋkulo nɖee n ɖa anii kaafala gabʊmbɔnɔ nɩ ma, kǝbaɖǝn ba lee koŋkaarɩ aɖʊ ntulo nɖe anii kagɩkrǝ nɩ. Aŋɔrɔ ɖe ‘ɩshilé ganaana na cɩɩnɩ kɩja nɩ na ŋkulo ŋŋunii n tʊr bʊkɔ́ɩ ba lee ma. Gani kaŋkǝm na gɩ sǝba na yɛɛ ɖaa gɩ nɩ gɩ sǝ̂ra alee naa ayɩɖa njɩ naa arɛ̀ a sǝ̂ra ayɔ wàà, Benɛɛ kantulo njɩ gǝŋ ma. Ʊshilé nɖee gɩ sǝba ayɩɖa ma na gǝŋ, gaja gaɖe kaŋɔrɔ anʊntaja ‘ʊshilé tǝb-n’ɩnan. Ama ɩ jɩ wàà, atɩnsǝbaka njɩ gǝŋ ma, ka gɩ sǝra ayɩɖa ɖaa ɩ sim ma na. Na gɩ tɩ ʊshilé ʊfɔlɩ nɖee gɩ yɩ̂ɖa acǝŋǝ ma. Kʊshilé ʊɖe lee aŋɔrɔ aɖɔŋkɔnɔ ɖe nɩ, ama ‘ʊshilé akoo-n’ɩriu.
Gɩ na yɩɖa na ce ma, gɩ wa n’ɩnawɩya tuutuuma. Ama ka gɩ kiɖe pɩ naa apala na. Na gɩ tǝwǝ ʊceruceru aŋɔrɔ nɖee a tǝr ma nɩ, ‘ɩshilé tǝb-n’ʊɖǝn n’akoo-na-kulumi kɩja nɩ. Ɩnawɩya mbaɖee gɩ wa na ma, ma na gǝŋ, ɖaa gɩ nɩ gɩ kʊ̂n ntulo nɖe ayɩɖa ɖaa basaaka ba yɩɖa na gɩfɔŋkrǝ n’ɩ sǝ na gʊcǝŋkǝka kayɔkɔ ma.
Nawɩya afɔlɩ nɖee gɩ wa na ma, ma na gǝŋ, wàà ɖaa gɩ cǝpra ntulo apɩ na anii nɩ ma, ɩ wʊɖa bʊlei bʊɖǝn bʊ lama awu gɩfɔŋkrǝ nɩ kabʊja ma. Ɖaa gǝŋ ma, ɩɖe tɩ hɩyɛŋ wàà, gɩ lêe asǝŋsi afaa bʊlipi kabʊɖǝn koo ashɛr bʊ naa gɩ sǝ̂ra ayɩɖa ntulo nɖe n sǝ̂ kaɖeiɖei. Ama nawɩya abʊmbɔnɔ nɖee a ɖa ŋkǝŋ kagʊja gʊsaʊ ma na gǝŋ wàà, bʊlipi bʊɖe kʊfaaʊ koo kʊshɛr nɩ, ɩ sim wàà, atǝgalei ga kʊ̂n ɖaa ba lǝ gɩfɔnɔ nɩ ma. Gɩ wa n’ɩnawɩya tuutuuma mbaɖee ka gɩ sǝ̂ra atam na ma.
Ʊshilé ʊboŋoka nɖee gɩ yɩɖa naa aye sǝra aɖʊ njɩ ɛntɛrnɛɛtɩ laŋ ma na gǝŋ, gaja gaɖe kaŋɔrɔ kulumi kaja ‘ʊshilé ganaana kʊja.
Atʊŋɔn nɩ atɩya gɩ tɩ shee ataya Papa Ɔŋkoo nsala ɖaa a sɔlɔ anii kagɩkrǝ naa naa yɛɛ kaŋyɩɩ kʊcǝu ma. Aɖʊwaa a ŋǝ wàà, ɩkrǝ ɩfɔlɩ ɩ ɖa atǝgatǝna nɩ atɩya naa awʊɖa ntulo nɖe gboo ma. Gɩ ta kɛɛshɩɩ ɖaa gɩɖafʊnja na gɩsombaja ma, ba wʊɖa ntulo nɖe boŋo.
Anii kagɩkrǝ kaŋyɩɩ kʊceu kaŋkulo nɖee n kaŋa n’atʊ atʊr ntulo gʊbɔ nɩ naa apɛmpɛŋɛ bʊɖu bʊɖǝn naa akal n’atʊ gʊfaŋa ashee ntulo nɖe kabʊcǝma ma, gɩ tɩ shee pɩ nsala.
Gɩ tɩ sala bɛrɛ anii kaafala gabʊmbɔnɔ nɩ kǝbɛrɛ mbaɖee ba ɖa ŋkǝŋ na lee ntǝma ashee anii kagɩkrǝ kaŋyɩɩ kʊceu ma. Ba lee ka koŋkaarɩ abʊmbɔnɔ na gɩ sǝra aŋǝ ntulo nɖe kabʊcǝma. Gɩ sala bɛrɛ baŋunii mbaɖee ba rǝŋǝ ntulo nɖe naa ayʊga bʊciŋkǝrka n’atʊ ma. Bɛrɛ mbaɖee atɩnsala n cɔɔ atǝŋǝ na ma, ma na gǝŋ, atɩga mbaɖee ba pala ntulo nɖe n ɖa ɛntɛrnɛɛtɩ laŋ ʊrɔŋ ɖe ma. Bani pɩ gǝŋ arɛ̀ n’akar Martɛɛŋ TSASKƐ na Stɛfani TSASKƐ.
Ɩ ta naa yɛ̂ɛ ɩ ntulo nɖe, ɩ tɩɩ sǝ̂ra abɔ njɩ abɔlɔ nɖe nɩ :
Atɩntulo nɖe kʊwǝlǝ fɔɩ na kʊŋɔn arɛ̀ a sǝ̂ra acerecere ma na gǝŋ :
https://youtu.be/XvY8xJ1ku6w?feature=shared
Atɩntulo nɖe kʊyɩɖʊ kafiɖiyoo na kʊŋɔn na gǝŋ :
Atɩntulo nɖe kʊyɩɖʊ kafiɖiyoo n’acǝma kayʊlʊ nɩ gǝŋ :
https://youtu.be/P3CAxDMeJ1Q?feature=shared
Atɩntulo nɖe kʊŋɔn n’atɩgɩkrǝ anii ɩ ɖa ka gǝŋ :
Atǝgatǝna Benɛɛ kagʊlʊcamka kantulo
Ntulo kʊlǝlǝmǝ :
Benɛɛ kǝbapi, tâ ma ayiɖe !
Ʊɖaʊ fɛɛ ʊ tɩ yɩɖa ʊjakashilè
kantulo kǝŋkǝŋkǝŋ,
Benɛɛ kǝbapi, tâ ma ayiɖe !
Ʊla ʊsǝbaka :
Atǝbaya ba cee kʊn
ʊɖaʊ fɛɛ kʊyɩɖʊ
naa acǝ atara
ɩbʊmbɔnɔ n’ɩkashɩ
n’ʊcine na koŋkaarɩ
n’ʊciŋkǝrka halɩ babʊce.
Anyɩn mbaɖee ganɔ gaɖǝn nɩ
ɩ kaŋkǝr awu na cɩ ɩbobo
ashee ʊrɔŋ pɩ̂ ma gboo
atɩ na lee ntǝma nɖe baa njǝŋ.
Pɛ̂mpɛŋɛ ma ashee gacǝŋ kasaamanɩ !
Ɩ pàá kpâ anyɩn na !
Ʊla ʊnyɩʊtaja :
Ʊnyana n’ʊŋou kasǝrǝ
ɩ ta naa wû baa ŋka na,
akɩ, Benɛɛ kʊpi,
lâa akʊʊlɔ, ɩ ɖâ akɩ fɛɛ.
Kîɖe akatuuta ashee ɩjà
aɖʊ gacǝŋ kabʊcǝma laŋ.
Bʊtutolo nɩ ʊ taa ŋǝ̂
ʊkantam ashee ʊfʊbʊŋǝrǝ,
Bʊrana bʊ tɩ lige akɩ
atǝbayà bɩcine.
Bʊkelencaŋato arisikiɩ
a wu ma, kaŋkʊlɩ.
Ʊla ʊriutaja :
Amasɔlɔka Benɛɛ baa ŋka
akabʊnʊ ɩ ɖa ʊshilèka ma,
akapà n’akaatǝna kanɖawa
ɩ na faŋa akǝbʊcǝma.
Akaatǝna ga tɩ shee baa aŋa
awaryɔkɔ kamaana.
Benɛɛ, gɩ tɩ nyiŋǝ wàà,
atɔɔ n’ʊrɔŋ akǝbapi ba mân na ce ŋyɩɩ,
ʊpaɖʊ̀pàɖʊ̀ ʊ pàá ɖâ ncǝn na,
ba wʊ̂ɖa tamaa na ŋǝ akɩ
ganyana nɩ,
na ce na ce.
