Na galaɩ ma, jamaa aŋunii.
Bafolaŋɩ kʊwalʊ kafaawɩɩ na n wʊɖa na yɛɛ ma lêe ashee anyɩn, ɖaa ba jɩ ʊ ma.
Ba tine ʊwalʊ ɖe ma, ɩɖe tɩ lee alaamɩshɩ yofo ‘aŋɔrɔ anantaja ‘ʊshilé akoo-n’ɩkolom kʊja, gaja kotoku banyɩʊ-n’akoo-n’ɩriu.
K’ɩ lee tam nɖee ba cee na tine ʊwalʊ ɖe ma na gǝŋ na, ba kim na ʊ na ace na ŋyɩɩ, aɖʊwaa tam nɖee ba cee na tine ʊwalʊ ɖe ma, kaŋɔrɔ a kpa ganʊkʊrka katam nɩ ɖeiɖei, ɩ jee galei ba kim na ʊ ace na ŋyɩɩ. Gǝŋ ma, ʊwalʊ ɖe ʊ kɔɔ ŋkǝŋ na gǝŋ gakoloŋ kaaja. Ama ɩ lee ʊciŋkǝrka na ashee jamaa aŋunii ɖaa kǝ ba tine ʊwalʊ ɖe ganʊkʊrka kaŋɔrɔ nɩ na ma.
Ama atʊ gɩ ce ʊwalʊ ɖe ashee atɩgɩkrǝ anii kaŋyɩɩ kʊceu ma, arɩsǝma yofo ‘aŋɔrɔ anantaja ‘ʊshilé akoo-na-kulumi kʊja na gǝŋ.
Basana ba pɩ ʊwalʊ ɖe gɩshɛbʊ, baŋono ba ɖoo alǝ bʊlei ɖaa ɩ sim ba sâra naa Bafolaŋɩ kampá n sǝ̂ alaafɩya ma. Bagʊyà gboo a ɖoo asala jamaa aŋunii naa anyiŋǝ ashee mpá. Ba cǝr acǝma naa akǝ agǝŋgǝŋǝ ashee bɛrɛ ba rɩ ajaŋ n’ʊwalʊ ɖe.
Anii kabɔ ɩyalaka gɩ toŋo ace na ŋkǝŋ ma, ba shɩ ɩ gɩshɛbʊ.
Ɩ lee ʊciŋkǝrka na ashee atʊ gboo ɖaa atɩgɩkrǝ gɩ ce ŋyɩɩ ma. Gaja ga tǝʊ n’atʊ bʊja tuutuuma. Ami.
