Bʊpapiri mbʊɖee nɩ gɩ ce ma na gǝŋ, Mbɔrɔkɔ, Saramaŋga na Agerenɖebu. Ɩɖe tɩ lee arɩsǝma yofo ‘aŋɔrɔ akolontaja ‘ʊshilé ʊnyɩʊtaja gaja kotoku-banyɩʊ-n’akoo-n’ɩriu.
Mbɔrɔkɔ na gɩ sǝba akpa boŋo naɩ. Gɩ kpa ŋkǝŋ ma, gʊyà aɖe ɖa gʊyo kaŋkǝmǝ n’abaja na cam gʊsǝrǝ. Ŋkǝŋ na gɩ kpa na laabaarʊ ashee nɩ ŋgaɖee laŋ gɩ ce ŋkǝŋ ma. N’ɩ lee ʊciŋkǝrka ashee nɩ, n’a ta awala ajamaa aŋunii gʊmaŋgʊyo kaŋkǝmǝ.
Ŋkǝŋ na gɩ wala asǝ alee faawɩɩ, naa alǝ pɩ ɖaa atɩgɩkrǝ anii kantǝma n na ce ma, na gaɖuɩ gɩ lee akpa boŋo ma. Gɩ toŋo n’atɩgɩkrǝ anii kabɔ ace na ŋkǝŋ atʊr ashee pɩ, naa akʊɖa kaashɩ ashee pɩ ɖaa bʊlipi bʊɖǝn bʊ na lǝ ma. N’ɩ san na pɩ, aɖʊwaa atɩgɩkrǝ gɩ ce ŋyɩɩ boŋo.
Gɩ ɖoo ŋkǝŋ ma, na gɩ kǝ afǝl Saramaŋga ace Agerenɖebu naɩ, ba cam atʊ gɩshɛbʊ ŋkǝŋ gboo. Basoro na kǝbasǝmprǝ ba ɖoo arǝŋǝ ŋgaɖee laŋ gɩ ce ma.
Gɩ tʊr atɩgɩkrǝ anii kabɔ ashee pɩ naa atʊr ɖaɖaa kɩjɩʊ ɩleeka kʊfaŋʊ tapolii laŋ. N’ɩ lee ʊciŋkǝrka ashee atǝbana mbaɖee ba ɖa ŋkǝŋ ma, aɖʊwaa ba lige ɖoo ɖaa ba bʊŋa na lee ma, naa akɔɔ alee ʊciŋkǝrka ashee pɩ ɖaa atɩgɩkrǝ gɩ ce ŋyɩɩ boŋo, na ɖaa atǝbafaŋaka ba lee koŋkaarɩ naa atɩgɩkrǝ gɩ ce ŋyɩɩ ma.
N’ɩ san na pɩ ɖaa ka gɩ nyir balaŋ na ma. Anii kabɔ ɩyalaka gɩ toŋo ma, ba shɩ ɩ gɩshɛbʊ naa akɔɔ cam atǝgatǝnleeɖu kanɔmba.
Gɩ ɖoo ŋkǝŋ ma, na gɩ kɔɔ Saramaŋga, gʊyà sul. Gɩ kpa ma, aɖe sǝ nɖɔŋka n’abasoro na kamakama. Ŋkǝŋ na a ta atoŋo atʊ ace n’agaɖufal halɩ aŋku nɩ. Aŋku nɩ na gɩ sǝ alee faawɩɩ nɖee a ce n’atʊ ŋkǝŋ ma, n’ɩ lee ʊciŋkǝrka ashee nɩ ɖaa gɩ lee koŋkaarɩ ashee atɩgɩkrǝ gɩ ce ŋyɩɩ ma, naa anyiŋǝ ashee atʊ.
Ama gʊyà k’a na rǝŋǝ gɩfɔŋkrǝ na, gɩ na kʊɖa n’atɩgɩkrǝ anii na, na shee nɩ. ‘Ʊcine ʊ kǝr n’atʊ ɖaa gɩ jeɖe nɩ gǝŋ ma. Gɩ na shɛʊ ma, n’a yala atʊ aɖoo na nɖɔŋka.
Atʊgʊkamakama gʊɖe gʊ lee ʊciŋkǝrka na ashee bʊpapiri bʊɖe bʊŋunii ɖaa ŋkulo anii kɩ n nyir balaŋ na ma.
