Alaarba afɔ́nɔ̀ ‘aŋɔrɔ anʊntaja kʊshilé akoo-n’ɩnan kʊja gaja 2023 na gɩ ce atɩgɩkrǝ anii kʊfaŋʊ Bashɩɖɩ atɩya kakoloji asǝbaka nɩ. Ɩɖe tɩ lee UMOORU Alijannatu, ISIFU Rahinatu n’IBRAHIM INUUSA Malookiya na gǝŋ.
Gɩ kpa sukuru nɩ asǝba ntǝma ma, bʊkɔŋkɔŋɔ̀ tǝb n’anaŋa akoo gajaka. Ntǝma n sara gɩshɛbʊ. Gɩ sǝba njɩ halɩ atɩ boŋo ma, nawɩya ɖǝn k’a ɖa ncǝn na.
Bapi ba pɩ ayɔgɔ basoro na basǝmprǝ. Ntǝma kaasana nɩ, gɩ ŋǝ wàà, bapi ba shee balɔ ɩjá, asɔlɔ na yɛɛ ba yɔ̂ bagɩkrǝ kʊŋɔn na kʊtʊr. Aɖʊwaa kǝ ba lee ŋkǝmprǝ na, kǝ ba na ta na ɖoo fɔɩfɔɩ na, naa naa ɖʊ atʊ gʊtɔ gɩshɛbʊ. Bʊkɔ́ɩ ba faŋa pɩ ma, ba tɩ tɔɔ kpaarɩ.
Gɩ tʊr ɩfaawɩɩ baɖǝnɖǝn ashee pɩ n’ʊwǝlǝ ʊkaŋkra. Kaŋkǝm baɖe gboo ba tʊr ace gɩɖǝnɖǝn. Ʊtʊr ɖe nɩ, gɩ ŋǝ wàà, bapi tuutuuma ba kaŋkǝr ncǝn boŋo. Ama nnyǝmǝ na baɖǝn ba sǝba. Gɩ wʊɖa tamaa bafɔlɩ baɖe laŋ. Gaja ga pâla baŋunii ba yɔ̂.
Aŋɔnka :
UMOORU Alijannatu