Arɩsǝma n’asiibi afɔ́nɔ̀ ‘aŋɔrɔ tǝb-n’ɩnyɩʊ kaja ‘ɩshilé akoo-n’ɩnyɩʊ n’akoo-n’ɩriu kɩja nɩ na anii kǝbayarɩ ba lee bʊwalʊ tǝb kʊja Bayaakʊ kampá nɩ. Ɩshilé ɩnyɩʊ ɖe nɩ anii kǝbayarɩ ba sǝ atǝn alige anii kaɖaɖaa kalesʊra ɩɖǝn, ɖaa ɩbobo, baŋono bacǝrá ba bʊŋa na cǝr ma ; ba ɖoo na ɖooɖoo kayɔkɔ afaŋa bɛrɛ, naa asaŋ kɔɔ faŋa ɖaa ba na jɩ gʊyɛɛ ŋŋɔ nɩ ma, n’aleu tuutuuma ɩfɔlɩ ɩɖǝn… Arɩsǝma kʊshilé na ba lee ɩni ɖe gǝŋ.
Asiibi afɔ́nɔ̀ ‘aŋɔrɔ tǝb-n’ɩnyɩʊ kaja ‘ʊshilé akoo-n’ɩriu kʊja ʊ lee ka ʊshilé ʊboŋoka nɖee bɛrɛ tuutuuma ba ce ma. Ʊni na anii kǝbaŋono baŋono tuutuuma ba ce Bayaakʊ ɖe. Anii kǝbayarɩ baŋunii ba wa Bayaakʊ kaayarɩfala nɩ asǝ atǝn ayɛɛ gʊfaŋa ɖaa ba sâra naa atʊ anii kǝbapi gɩ ɖâ alaafɩya naa baamʊnʊ ɩ cê ŋyɩɩ ma. Gani kaŋkǝm ba nyaʊ bʊlei bʊfɔlɩ ashee anii kaɖaɖaa kaŋyɩɩ kʊceu. Ba ɖoo gayarɩfala nɩ ma, na ba ce gaɖuɩ ba kpeɖe ashee ʊwalʊ ɖe ma, ɩɖe tɩ lee Bayaakʊ kasukuru ajala nɩ.
Ba kpa ŋkǝŋ ma, na Bayaakʊ kagʊpayarɩ a ɖoo asala bɛrɛ tuutuuma mbaɖee ba pala batǝma apɩ Bayaakʊ ashee anii kaɖaɖaa kaŋyɩɩ kʊceu ma. Ansala kaŋkǝm na aɖi aɖi baja baɖǝn ba ɖoo apɩ na bɩfaawɩɩ aŋfaanɩ kǝbaja. Ba lǝ bʊlei tuutuuma, ama ŋgaɖee baŋunii bɩnyine ɩ kǝm na ma awu ma na gǝŋ : Bafǝlanɖɩja na bafʊmɩ. Bafǝlanɖɩja ba na toŋo ɩná na kpa na bɛrɛ bɩwara nɩ ma. Mbaɖee ba ri bɛrɛ alugo na taba ɩtambʊmbɔnɔ ma, na mbaɖee ba na kǝl ɩnyɩŋca na pǝr bɛrɛ bɩmaanà ma. Bʊlei bʊɖe bʊ lee ka kpatakɩɩ ashee anii kaɖi baja mbaɖee ba wa Bayaakʊ kampá nɩ ʊshilé ɖe ma. Ba kɔɔ lǝ bʊlei tuutuuma bʊfɔlɩ acǝŋǝ ka gɩ sǝ̂ra atam bʊŋunii na…
Ba boŋo ma, na ba shee atʊ [SIL] ʊwǝlǝ gɩ ɖoo gɩcɩɩca akʊɖa atatǝma tuutuuma ɩɖǝn ashee bɛrɛɩ ba ɖa ʊwalʊ ɖe nɩ ma. Gɩ faŋa mbʊpá nɖee gɩ kʊɖa ma « Eemil », anii kaɖaɖaa kabɔ ɩɖǝn : ɩbobo, ʊnyenu na faaba. Gɩ kʊɖa ɩcǝpǝrʊ ɩjala [applis] ɩfɔlɩ gɩ lee ma, ashee bɛrɛ naa akɔɔ faŋa pɩ ɖaa ba lêe naa asǝra na lo ɩ batǝncacaʊ kɩnyipi nɩ ma. Gɩ yʊga bɛrɛ bʊbʊkǝli bʊfɔlɩ mbʊɖee laŋ gɩ ɖʊ atatǝma tuutuuma ɩɖǝn ma. Ba ta kpâ ɛntɛrnɛɛtɩ nɩ ba sǝ̂ra na ŋǝ bʊkɔ́ɩ gɩ na lee atǝgatǝnleeɖu ma.
Gɩ yala atabɔ ɩɖǝn, naa kaŋa na bɛrɛ atʊr. Ʊwalʊ ɖe ʊ san, na gɩ na nyiŋǝ Gaja ga kpâ n’atʊ gajɩfɔlɩ naa gɩ kɔɔ wâ n’alaafɩya.
Aŋɔnka : IBRAHIM INUUSA Malookiya
[avatar user= »malokia » size= »original » align= »left » /]