Yofo ‘aŋɔrɔ tǝb n’ɩnyɩʊ kaja nɩ na Bashɩɖɩ kǝbapi ba lee bʊwalʊ. Ʊwalʊ ɖe ba tine nɩ na yofo ‘aŋɔrɔ ‘ʊshilé akoo-n’ɩkolom kʊja naa ariŋ nɩ aŋɔrɔ ɖe ‘ʊshilé akoo-na-tǝb kʊja. Bashɩɖɩ ʊpacine nɩ kɩkaracɩ baŋunii ba pɩ ʊwalʊ ɖe. Ʊwalʊ ɖe ba na lee ʊ na gaja baa gapaŋa.
Gakoloŋ kʊja ʊ lee ka akpala ɩshɩnyɩʊ-n’ɩnan kʊja. Gǝŋ ma ɩɖe tɩ ɖoo bʊja ɩshɩnyɩʊ-n’ɩnan Basǝɖa bapur ba sǝba na wala bawor ma. Ɖoo ɖaa ʊwalʊ ɖe ʊ sǝba ma, kǝ ba nyǝm gaja gaɖǝn afǝl na, ba shɩ na wa wa na lee ʊwalʊ ɖe.
K’ɩ lal n’ɩkaracɩ banɖǝnɖǝn na, bɛrɛɩ ba shɩ lee Bashɩɖɩ ʊpacine nɩ kǝbapi ma, ba pɩ ʊwalʊ ɖe na gɩshɛbʊ. Bɛrɛ ba ɖoo na bʊtǝna bʊtǝna bʊ apɩ, tɔɔ na Garɩɖontǝna, Garɩfɔntǝna halɩ Gamalɩkatǝna nɩ na apɩ Bashɩɖɩ ashee ʊwalʊ ɖe. Ɩ shɩ ŋǝ ɖaa bɛrɛ ba pɩ ʊwalʊ gɩshɛbʊ ma, gǝŋci ba ɖʊ ɩtanɩ gboo gɩshɛbʊ. Gɩ ta lǝ̂ wàà gɩ lǝ̂, ɖoo ɖaa ʊwalʊ ɖe ʊ sǝba ma, gakoloŋ n’ɩtanɩ ɩ kpa ʊwalʊ kabenci nɩ awu. Aɖʊwaa, ɩtanɩ nɖee ɩ kpa benci nɩ gakoloŋ ma, ɩ tǝ ɖaa bʊkuli bʊkolom na gatǝrkǝma ma.
Gakoloŋ kʊwalʊ ʊ cɔɔ ɖa aske na. Aɖʊwaa Bashɩɖɩ ʊpacine nɩ kɩkaracɩ basǝmprǝ mbaɖee ba shɩ pɩ ʊwalʊ ma, baŋunii ba pɔɔ yaaye na akara ʊwalʊ kʊshilé ʊsǝbaka. Bɛrɛ baŋunii ba cɔɔ kʊma ʊŋono Rufaɩ AKƆBƖ ashee akoŋkaarɩ a lee asǝra awala Bashɩɖɩ kǝbapi ba pɩ ʊwalʊ ɖe gɩshɛbʊ ma laŋ. Ma lîge anyɩn wàà, a lee ka ʊwalʊ kamboi kʊŋono.
Bʊkɔ́ɩ bʊ shee lee kpatakɩɩ ma na gǝŋ wàà, GʊGʊ kaŋkulo n ɖoo ʊwalʊ nɩ ɖaa baa gaja gapaŋa ma. Ama gakoloŋ, bʊkɔ́ɩ ŋkulo n lee ma, ɩ cɔɔ lee bʊkɔ bʊsoŋsono bʊ. Ʊwalʊ kʊtinu nɩ, ba shee GʊGʊ kaŋkulo ʊwǝlǝ n lǝ bʊkɔ́ɩ n lee gaja gapǝlmǝ nɩ ma. GʊGʊ kaŋkulo kʊwǝlǝ ʊcamka nɩ, n laa abʊpá ɩfɔlɩ nɖee n ɖoo na ma ma, afaŋa bɛrɛ. Bɛrɛ ba ta shɩ abʊpá ɖe.
Ama k’ɩ lal na gani kanɖǝnɖǝn na. GʊGʊ kaŋkulo n faŋa bɛrɛ anii kʊtʊr tɔɔ n’ʊwalʊ kʊshilé ʊsǝbaka halɩ kʊshilé ʊboŋoka. Ama bapi ba cɔɔ ka pɩ atɩ cere cere anii kʊtʊr. Gaɖuu ŋkulo n shee faŋa bɛrɛ anii kʊtʊr ɖe ma na gǝŋ, Bashɩɖɩ ʊpacine nɩ kasukuru ajala gɩcɩɩca kaja nɩ. Aɖʊwaa ŋkǝŋ na Bashɩɖɩ kǝbapi baŋunii ba wala alee bʊwalʊ.
Ʊfaŋʊ ɖe, gajaka bʊkɔŋkɔŋɔ̀ cɩɩnɩ na ʊ na sǝba. Ŋkulo n pɩ ka n’abʊtʊrka, gayʊlɩ galǝka na bʊlei n’ashei nɖee laŋ bapi ba na sǝ ma. Ŋkulo nɩ kǝbaja ba na tʊr tʊr, bacerecereka gboo baɖe ba tɩ tɔɔtɔɔ ɖaa ba na yɩɖa ma na tʊr. Baɖe ba tɩ man na tʊr. Ɩ tɩ́ lee ma, baɖe ba tɩ laa bacerecereka gɩɖǝnɖǝn baɖe ba tɩ tʊr ; arɛ̀ɩ a na faŋa pɩ ma, aɖe tɩ tǝŋǝtǝŋǝ pɩ. Gǝŋci ŋkulo n lee halɩ ʊwalʊ kʊshilé ʊboŋoka. Bapi baɖe, ba ta sǝba na tʊr bakɔ. Kǝbaɖǝn ɩ ta ɖa ɖaa, ba cee cere anii na kʊtʊr gaɖu gaɖǝn ayɔ ma.
Gɩ tɩ nyiŋǝ atǝbaya n’atǝbana, ba ɖʊ̂ atǝbapal ɩkashɩ ba kâra gayɛ acere anii kʊtʊr na kʊŋɔn aɖʊwaa ɩ tɩɩ tɩ́ lêe aŋfaanɩ ashee pɩ. Ɩ ŋǝ ba sǝba na lǝ wàà, ba tǝ ba sǝba na faŋa ɩkrǝ ba ŋʊm n’atʊ ma ɩsukuru bajala nɩ ma. Na ka gɩ kara gayɛ na, ɩkrǝ ɩfɔlɩ nɩ ba pɩ̂ na ma ɩsukuru nɩ ashee atǝbapi ba cêre. Ɩ ta tɩ́ pɩ̂ ɖaa gǝŋ ma boŋo, atɩgɩkrǝ gɩ na li li gǝŋ. Gɩ cɩ̂ ɩbobo ashee anii kagɩkrǝ kaŋyɩɩ kʊceu.
Atɩgɩkrǝ ! Gɩ cê ŋyɩɩ !
Atɩgɩkrǝ ! Gɩ cê ŋyɩɩ !
Atɩgɩkrǝ ! Shee gɩ yɔ̂ jɩ kʊŋɔn na kʊtʊr !
Aŋɔnka : ƖSA ASIS Rahaman
[avatar user= »rahaman » size= »original » align= »left » /]