Asiibi yofo ‘aŋɔrɔ tǝb-n’ɩnyɩʊ kaja ‘ʊshilé akoo-n’ɩnyɩʊ kʊja ʊ lee ka ʊshilé nɖee Anii kǝbayarɩ ba wala ajɩ jɩŋgaarɩ ma. Anii kǝbayarɩ baganɔ gaɖɔŋkɔnɔ gaɖe ga jɩ ka wàà, (ARACA).
Gaɖuu ba jɩ jɩŋgaarɩ ɖe ma na gǝŋ, Pɛnɛlaŋ kampá nɩ. Jɩŋgaarɩ ɖe nɩ, bɛrɛ tuutuuma ba ɖa ka ŋkǝŋ.
Bɛrɛ baɖe, gɩ ta lǝ̂ wàà, gɩ tâm, gɩ tɩ gɩ lǝ̂ wàà, ataya Mɛɛr GOMINA Abubakarɩ a ɖa ŋkǝŋ, ataya TAASƱ Filkibiru, atana SAALIU Alijannatu, ataya AƉAM Tafa na bɛrɛ tuutuuma baɖǝn acǝŋǝ apele na bayarɩ anii kapá kǝbaja baŋunii.
Ama gakoloŋ kaja jɩŋgaarɩ Kura kǝbayarɩ gboo ba pɩ. Kura kǝbayarɩ banɖiyar a cam ʊwǝlǝ ma, n’a laa na faŋa wàà, ɩ lee ʊciŋkǝrka ashee baɖe Kura kǝbapi ɖaa ba yɩɖa baɖe jɩŋgaarɩ nɖe nɩ ma. Ama baɖe ba tɩ nyiŋǝ, ɩ jɩ̂ wàà, baɖe ba kpâ jɩŋgaarɩ ɖe nɩ, ɩ pàá kɔɔ lal n’anii kǝbaja banɖǝnɖǝn na.
Ataya Mɛɛr GOMINA Abubakarɩ, ‘ʊwǝlǝcamka nɩ, a tɩ̂ laa na faŋa wàà, ɩ lee ʊciŋkǝrka ashee aɖe ɖaa Anii bayarɩ ba ri bawor na wa na yɛɛ ganɔ gaɖɔŋkɔnɔ ma. Aɖe tɩ nyiŋǝ pɩ, ba bɔ̂ bayarɩ basaaka Bashɩɖɩ kakɔmin nɩ apele ncǝn na man na jɩ jɩŋgaarɩ ɖe naa baɖe gboo ba lee ataɖi baja ma, ba naa kâŋa na pɩ jɩŋgaarɩ ɖe kalesʊra nɩ.
Ataya TAASƱ Filkibiru, Anii kǝbayarɩ ‘bakalkanama, ‘ʊwǝlǝcamka nɩ, a laa afaŋa ‘ʊciŋkǝrka ɖaa baa gaja gapaŋa jɩ ʊwaʊ ɖe ʊ na lee gǝŋ ma. Gani kaŋkǝm na a sala bɛrɛ baŋunii ashee koŋkaarɩ nɖee ba na lee ashee jɩŋgaarɩ kabʊcǝma ma. Galaŋ aɖe tɩ nyiŋǝ alaafɩya na ŋŋuro nlamaka na shee bɛrɛ baŋunii naa akɔɔ na nyiŋǝ ba kɔɔ kpâ bɩfala nɩ n’alaafɩya.
Ɖaa baa gaja gapaŋa ma, jɩŋgaarɩ ɖe nɩ, acǝrá asʊ̀rá asʊ̀rá ɩ ɖoo n’anii kapá na kɔmin nɩ apɩ. Gakoloŋ acǝma ɖǝn ɩ ɖoo na Alijo kagʊsaʊ gboo a pɩ Pɛnɛlaŋ.
Acǝrá kaŋkǝm, ba cɩ ɩbobo gboo jɩŋgaarɩ ɖe nɩ. Ama naa ba ye sǝba ɩbobo ɖe, ba laa ɩbobo kɩmʊra afaŋa bɛrɛ naa gʊcǝrá gʊɖe nɩ ɩnawɩya ba pàá tɩ́ ɖâ ncǝn na.
GʊGʊ kaŋkulo gboo n ce jɩŋgaarɩ ɖe nɩ, aɖoo n’abʊpá asʊ̀rá asʊ̀rá ɖaa abʊpá ɩshɩnyɩʊ ma. Abʊpá ɖe ɩŋunii na gɩkrǝ anii na gɩ ŋɔn na ɩ. Bɛrɛ baŋunii bɩcine ɩ ta kǝr ɖaa Anii kagɩkrǝ gɩ na ce ŋyɩɩ ma.
Anii kǝbayarɩ baɖe ba na lee koŋkaarɩ na yɛɛ Anii kǝbapi ba wʊ̂ɖa ganɔ gaɖɔŋkɔnɔ, na lǝ na rǝŋǝ na bawor ma, ba pa ɖaa tǝb-na-ganaana ma. Ama bayarɩ mbaɖee kǝ ba lee Anii kǝbayarɩ na ma, ba pɩ jɩŋgaarɩ ɖe nɩ gboo.
