Atalaata afɔ́nɔ̀ ‘aŋɔrɔ tǝb-n’ɩnyɩʊ kaja ‘ʊshilé akoo-n’ɩnʊn kʊja na ba lee Anii kaɖaɖaa kacǝrá kajɩŋgaarɩ. Gaɖuu ba lee jɩŋgaarɩ ɖe ma na gǝŋ, Bashɩɖɩ mpá nɩ kasukuru ajala gɩcɩɩca kaja nɩ.
Arɛ̀ nɖee a na lee koŋkaarɩ ashee jɩŋgaarɩ ɖe ma na gǝŋ, Ɖin AƉAMU JERIWO. Bʊkɔ́ɩ laŋ a na lee koŋkaarɩ na lee jɩŋgaarɩ ɖe gaja baa gapaŋa ma na gǝŋ, acǝrá ɖe ɩ pàá lî na, aɖʊwaa katuutuuma ɩ li boŋo.
Gakoloŋ kaja jɩŋgaarɩ ɖabanna acǝrá, ɩsuko ba pɩ jɩŋgaarɩ ɖe, baa maa ɩsuko kǝ ba lee Anii mana babʊkɔ na. Ama naa jɩŋgaarɩ a ɖʊr laŋ na, a pala ba pɩ.
GʊGʊ kaŋkulo gboo n ɖa jɩŋgaarɩ ɖe nɩ n’anii kabʊpá. Abʊpá ɖe kɩɖǝn, ɩ na lǝ Anii kaɖaɖaa kabʊlei bʊ ɖaa ɩbobocɩka, faaba n’ʊnyenu ma. Gɩ ŋɔn abʊpá ɖe nɩ naa ɖaɖaa kayɔkɔ ɖe ɩ pàá lî na, aɖʊwaa ɩɖǝn ɩ tɩ li boŋo.
Bʊkɔ́ɩ bʊ lee kpatakɩɩ ma na wàà, basǝŋŋono ba lee ɖooɖooɖo kɩjɩʊ ɩɖǝn ɩ na li ma, afaŋa bɛrɛ. Bɛrɛ ba ta kʊma pɩ ashee ɖaa koŋkaarɩ ɖe ba lee na yɛɛ bapi bajala ba yɔ̂ ɖaɖaa kɩjɩʊ ma. Gɩ ta lǝ̂ wàà, gɩ kɛ̂ɛshɩɩ ɩjɩʊ ɖe, gɩ ŋǝ mbooɖakala, koikoi, kakanyɛnyɛ, kakanyɛnyɛ ŋkǝma nɩ kaja, nɖuɖoo mpaɖaka, nnɔɔbata na gɩna. Ŋkulo nɖee n lee ɩjɩʊ ɖe ma na gǝŋ, atana Kpeinyaa aŋkulo.
