Ʊshilé ɖǝn na ayifala ba na yɩɖa wàà, Nayilu Malaɩka ma, a jeɖe atʊ gɩ ɖa sukuru nɩ na faŋa anii kagɩkrǝ ma, afɔ́nɔ̀ ‘aŋɔrɔ tǝb-n’ɩnyɩʊ kaja, gaja kotoku-banyɩʊ-na-tǝb-na-ganaana nɩ. Ɩɖe lee Bashɩɖɩ kʊwalʊ gɩ na jɩ ba na yɩɖa wàà, [ARDABs] ma, kasáà.
Kʊshilé ɖe, atʊsoro Nayilu a kpa ma, n’a sara akiɖe atakulo katǝma naa asǝ akiɖe ɖaa gɩ na lee ma, kpataa. Gɩ boŋo ma, n’a cam baa aŋa ‘ʊwǝlǝ aɖʊ. Baa aŋa lǝ bʊkɔ́ɩ a na lee anii kaafala gabʊmbɔnɔ nɩ ma, ɖaa atǝma ɩ na sara ma, ɩnawɩya mbaɖee ba ɖa ncǝn ma.
Gani kaŋkǝm na gɩ nyiŋǝ Anii kʊpi baa apaŋa na a lêe koŋkaarɩ, baa ŋka na a ɖa a yɔ̂ agɩkrǝ kʊŋɔn na kʊtʊr naa alesʊra tuutuuma ɩ pàá tɩ́ fǝ̂l nɩ na. Gaja ga shêe atʊsoro Nayilu Malaɩka ŋŋuro nlaŋlaŋa n’alaafɩya naa a sǝ̂ra gboo akaŋa n’atʊ, naa agɩkrǝ anii gɩ kɔɔ cê ŋyɩɩ awu wáá.
Aŋɔnka : ISIFU SƱMAANƱ Mustafa