Gaja kotoku-banyɩʊ-n’akoo kaŋɔrɔ ariutaja nɩ, na korona kagʊmaŋga gʊ waga ɖulinya aŋunii. Bʊtǝna tuutuuma nɩ, ʊba a lǝ wàà, bɛrɛ ba sǝ̂ bɩfala nɩ, ɩsukuru ba riŋ, afala n’ʊmanʊ ɩ fǝna yîɖe. Togoo na Benɛɛ nɩ ʊkǝluyiɖe (kɔŋfinemaŋ) ʊ ɖa, Gafɔntǝna [Europe] nɩ gboo.
Aŋɔrɔ ɖe kʊshilé akoo-n’ɩnan kʊja n lee na Anii kʊsǝmprǝ ɖǝn a ɖa Parii kampá nɩ ma, faawɩɩ WasAp laŋ. N’a lǝ amʊ wàà, gʊsǝtǝna gʊ bɩyɛ aɖe. Na gɩ faŋafaŋa wàà, ɩ ta jɩ̂ wàà, gɩ tɩ gɩ sǝ̂ra asǝba anii kʊtʊr na kʊfaŋʊ WasAp laŋ ashee bɛrɛ mbaɖee ba sǝ ɩfala nɩ nnyǝmǝ ma, aɖʊwaa kǝ ba sǝra aɖoo na. Na gɩ lǝ wàà, gɩ tɩɩ sǝ̂ba naa aŋǝ, ɩ ta jɩ̂ wàà, ɩ tɩɩ sâra.
Na gɩ ɖʊ ʊkʊl WasAp kakulo ɩɖǝn nɩ naa ashee mbɔlɔ nɖee bɛrɛ ba sǝ̂ra akpa Anii kʊceru kaŋkulo WasAp laŋ ma. Ʊshilé ʊsǝbaka, bɛrɛ ɩshɩnʊn na kaŋkǝm ba ɖʊ ka bayɩɖa, na gɩ sǝba ʊfaŋʊ kpaarɩ.
Gɩ tɩ togo ʊfaŋʊ ɖǝn baa ʊshilé ʊpaŋa na. Gɩ tɩ lo ɩfoto, ʊwǝlǝcamka n’ɩfaawɩɩ asʊ̀rá asʊ̀rá na faŋa n’anii kɩɩbii ɩŋunii. Na gɩ togo abɔ n’abʊpá ɩtʊrka asʊ̀rá asʊ̀rá naa bɛrɛ ba naa tʊ̂r ɩ baa njǝŋ.
Baa ʊshilé ʊpaŋa na bɛrɛ ba shɩ na pele pele ŋkulo nnɖe nɩ. Ɩ pala ka, ɩbɔkɔɩ banyɩʊ kaŋkǝm gɩ tine ŋkulo nnyɩʊtaja. Ʊrɔŋ, gɩ wʊɖa akulo kulumi na bɛrɛ gɩwa na kaŋkǝm.
Nnyǝmǝ, ɩŋɔrɔ tǝb-n’ʊɖǝn kaŋkǝm, gɩ kɔɔ tɩ togo ʊfaŋʊ ʊfɔlɩ ɖǝn ʊshilé baa ʊpaŋa na. Gɩ wʊɖa tamaa na ŋǝ wàà, atǝbacereka ba sɔlɔ anii kʊtʊr.
N’ɩ san n’atʊ ɖaa anii kǝbaja baɖǝn mbaɖee ba ɖa ɖulinya aŋunii nɩ ma, ba sǝra na cere anii kʊtʊr batǝncacaʊ kɩnyipi laŋ ma.
Gɩ tɩ sala n’anyɩn.
