Ɩ lee kɛrɛ gɩ sǝba ntǝma nɖǝn n’atǝbasoro Kàraa kǝbaja ma. Ɩɖe lee ʊsǝmprǝ nɖee ba na yɩɖa wàà, SOSUKPE Maat [SOSSOUKPE Marthe] ma, aŋkulo SIL Kàraa kanja.
Ʊshɛɖʊ ʊbɔnɔ nɖee ʊ waga ɖulinya aŋunii ba na yɩɖa wàà, Korona kaashɛmpɩɖɩpɩɖɩɩ ma, kɩbobo nɩ ba na cɩ na yɛɛ ba lâa mbʊpá ntʊrka njala nɖǝn n naa kâŋa na bɛrɛ ba sǝ̂ra alǝŋ na balɔ ʊshɛɖʊ ɖe.
Ba shee tɩ yɛɛ ba ɖʊ̂ ɩfoto ncǝn, na ba tǝm ashee atʊ gɩ laa ɩfoto baɖe apɛmpɛŋɛ gɩshɛbʊ atogo ashee pɩ ba lee na ma na.
Gɩ lee gǝŋ ma, ba kʊma kabʊcǝma, ɩ ta san na pɩ gboo.
Ɖaa ɩsǝbaka ɩ cǝm ma laŋ, kǝ ba yiɖe n’ɩni na, na ba lǝ wàà, baɖe ba tɩ yɛɛ ba lêe baashɩ́ n’ɩfoto baɖe. Galaŋ gɩ cɔ̂cɔ pɩ àtó, na gɩ laa nɖee ba hɩyɛŋ ncǝn ma, acɔcɔ àtó. Kaŋkǝm na gɩ kɔɔ laa gʊsʊ̀rá gʊɖǝn acǝŋǝ apele n’ɩŋono ɖe.
Ɩfoto baɖe, ɩ na ŋǝ wáá ma, atɩya na gɩ laa na gʊnyɛ, naa ace na ŋyofotala ŋkǝka laŋ atɩ pɛmpɛŋɛ pɩ ba cǝm ʊkiɖu gɩshɛbʊ.
Ɩ san na pɩ páá ɖaa gɩ sǝra arǝŋǝ na pɩ alee bʊkɔ́ɩ ba na yɛɛ ma, naa asan n’atʊ gboo ɖaa bɛrɛ ba hɩyɛŋ atʊ na gɩ sǝra arǝŋǝ na pɩ ma.
Gaja ga pâla gɩ sǝ̂ra na rǝŋǝ n’atǝbawor gǝŋ.
