Atǝgatǝnleeɖu katala ɩkǝka kakpatɩlɛŋɛ gɩ na lee na ntǝma ma, kɩɖǝn ɩ pɛɛpɛɛ ka. Na atɩntǝma kanɖiyar a ŋǝ waa akpatɩlɛŋɛ ɖe kagʊlɔ gʊ ci, k’ɩ kɔɔ sim gɩ na lo ɩ na.
Arɩsǝma afɔnɔ ‘aŋɔrɔ tǝb-n’ʊɖǝn-kaja ‘ɩshilé akoo-na-cɩɩnɩ kʊja (29-11-2013) n’a togo ntala ŋkǝka kakpatɩlɛŋɛ ɩfɔlɩ Jugu. Ayɔkɔ ɖe, ɩ ɖe bon arɛɩ a na yala ma sul, na tǝbǝ atogo Kʊtɔnʊ ashee atʊ.
Atalaata afɔnɔ ‘aŋɔrɔ tǝb-n’nyɩʊ kaja ʊshilé ʊriutaja (03-12-2013) kʊja na ce ɖaa bʊkɔŋkɔŋɔ bʊnan nɩ ma, n’ayɔkɔ ɖe ɩ kpa Bashɩɖɩ, na ba yɩɖa atɩntǝma kanɖiyar alǝ, naa tǝbǝ ayɩɖa atʊsoro Nuhum a ce tɩ cam ɩ apɩ na ma.
Kʊshile ɖe nɔɔ n’atɩntǝma kanɖiyar a shee atʊsoro Nuhum ɩtanɩ a ce tɩ togo na Poosu ashee arɛ̀ nɖee a togo ayɔkɔ ɖe ashee atʊ ma. Ɩtanɩ ɖe ɩ kpa ma, naa yɩɖa atʊ asala. Nyǝmǝ atɩcine ɩ kǝr, aɖʊwaa gɩ ŋǝ ntala ŋkǝka kakpatɩlɛŋɛ ɩfɔlɩ gɩ naa lô ntǝma nɩ.
[avatar user= »malokia » size= »original » align= »left »]