Alahaɖɩ, afɔ́nɔ̀ ‘aŋɔrɔ anantaja ‘ʊshilé tǝb-n’ɩnʊn kʊja, gaja kotoku banyɩʊ-na-tǝb-na-ganaana, ʊ lee ka ʊshilé nɖee Bafolaŋa ba wala asǝ atǝn alee ʊwalʊ ŋkpala nsǝbaka na yɛɛ bampá kaŋyɩɩ kʊceu ma.
Ʊwalʊ ɖe, ʊ lee ʊciŋkǝrka ashee bɛrɛ tuutuuma mbaɖee ba ce ma. Bɛrɛ bʊceu na bapaja bʊɖuú k’ɩ faŋa wàà, ŋkpala nsǝbaka njɩ gǝŋ na. Akulo tuutuuma n’acǝra asʊ̀rá asʊ̀rá na Bashɩɖɩ kakɔmin kanɖiyar n’abakǝŋja ba ce ka ʊwalʊ ɖe. Ŋkulo nɖee n na lee gɩkrǝ anii kakoŋkaarɩ ma, n ce gboo.
Ŋkulo nɖe n laa afaŋa bɛrɛ ɖaa ntǝma nɖe n na sara ma, n’abɔ nɖee ɩ ɖa aboŋo wàà, arɛ̀ a taa sǝ̂ra na cere n’ʊtʊr ma. Gani kaŋkǝm na gɩ lǝ ɖaa gɩ na togo akɔ́lɩ atǝncacaʊ kɩnyipi nɩ ma, na ɖaa arɛ̀ a ta naa yɛ̂ɛ atʊr atabɔ ɩnyipi ɖe nɩ ɖaa a naa sâra ma.
Ɩshilé tuutuuma na gɩ na lee n’atǝma gatǝnleeɖu, ama ʊshilé ʊɖɔŋkɔnɔ na gɩ na ce ɩwalʊ nɩ ɖaa wáá ma, afaŋa bɛrɛ ɖaa gɩ na sara ma. Aɖʊwaa basana tuutuuma ba na ɖoo na bʊtǝna bʊtǝna apɩ. Ɩwalʊ ɖe kʊceu, ɩ tɩ lee aŋfaanɩ tuutuuma ɖaa gɩ na wa na bɛrɛ ma. Gaja ga pêle koŋkaarɩ. N’ʊtʊr ʊsoŋsono ma.
